Almaty ákimi Erbolat Dosaevtyń halyqpen besinshi kezdesýi Jetisý aýdanynda ótti. İs-sharaǵa 500-den astam qala turǵyndary keldi, dep habarlaıdy Almaty-akshamy.kz.
Almaty ákiminiń málimeti boıynsha, Jetisý aýdany Almatynyń «kóne» aýdandarynyń biri bolyp tabylady, bıyl oǵan 86 jyl tolady. Tarıhı turǵyda ol ónerkásiptik jáne saýda aýdany retinde qalyptasty: bul salalarda 40 myńǵa jýyq adam nemese halyqtyń 45%-y qamtylýda. Aýdanda jeńil ónerkásip, jıhaz óndirisi damyǵan, birqatar iri zaýyttar jumys isteıdi.
Halyqpen kezdesý barysynda Almaty ákimi aýdannyń negizgi problemalyq máselelerin, sonyń ishinde eskirgen turǵyn úı, ınjenerlik jeliler men jol tóseminiń tozýy, stıhıalyq saýda, ekologıa jáne abattandyrý, sondaı-aq áleýmettik ınfraqurylym máselelerin atap ótti.
Búgingi tańda aýdanda sýmen jabdyqtaý jáne sý burý máseleleri, ásirese, "Kemel" shaǵynaýdanynda ótkir tur. Erbolat Dosaev ótken jyldyń qyrkúıek aıynda anyqtalǵan merdigerdiń jaýapsyz ekenin, sondyqtan sýmen jabdyqtaý jáne sý burý jelilerin salý jónindegi jobany iske asyrý kelesi jylǵa aýystyrylatynyn habarlady.
Aǵymdaǵy jyly Qazybaev, Rysqulov, Tátibekov, Raıymbek kóshelerinde sýmen jabdyqtaý jelilerin qaıta jańartý jáne káriz qurylysy boıynsha jumystar aıaqtalatyn bolady. Aǵymdaǵy jyldyń mamyr aıynda sýmen jabdyqtaý jáne sý burý jelileriniń qurylysyna memlekettik saraptama alyndy.
68 kóshede jumys shamamen 2023 jyldyń kókteminde bastalady. Qala basshysy joldar tek ınjenerlik jeliler paıdalanýǵa berilgennen keıin ǵana asfálttalatynyn atap ótti. Baıandama barysynda Almaty ákimi bıylǵy jyly jalpy uzyndyǵy 27,3 km bolatyn 20 kósheniń joldaryn ortasha jóndeý josparlanǵanyn aıtty.
Jaýyn-shashyn kezinde sý basý máselesin sheshý maqsatynda 7 mekenjaı boıynsha aryq júıesin jóndeý aıaqtalady, Raıymbek dańǵyly boıyndaǵy sý burý kolektorlary qalpyna keltiriledi, bul megapolıstiń joǵarǵy jaǵynan jańbyr aǵynyn azaıtýǵa múmkindik beredi. Qazirgi ýaqytta 27 kóshe boıynsha erigen qar sýyn burý úshin aryq jelileri men kolektorlardy salý jáne qaıta jańartý jumystaryn júrgizýge jobalyq-smetalyq qujattama ázirlendi, aýdan ákimdiginiń kúshimen 27 ýchaske boıynsha aryq jelilerine aǵymdaǵy jóndeý júrgizý josparlanǵan.
Jetisý aýdanynda jaryqtandyrý jáne elektrmen qamtamasyz etý problemalary baıqalýda. «Jańa Almaty» jobasyna sáıkes, aýdanda 162 jartylaı jaryqtandyrylmaǵan kóshelerdi jaryqtandyrý josparlanǵan. Qurylys-montaj jumystary úshinshi toqsanda bastalady. Erbolat Dosaev "Kemel" shaǵynaýdanynda elektrmen jabdyqtaý jelilerin qaıta qurý jumystary bastalǵanyn atap ótti. Olar aıaqtalǵannan keıin shaǵynaýdannyń árbir jeke úıi qalalyq jelilerge qosylǵan turaqty elektrmen qamtylady.
Mektepter men mektepke deıingi mekemelerde oryn tapshylyǵyn tómendetý maqsatynda aǵymdaǵy jyly 3 mektepke japsarlas qurylys salý josparlanýda. «Aınabulaq-4» shaǵynaýdanynda 1986 jyly salynǵan ǵımaratty buzyp, 160 oryndyq balabaqsha salynady. Ótken jyly ákimdik Ratýshnyı kóshesinde 280 oryndyq burynǵy balabaqsha ǵımaratyn satyp aldy, ol jyl sońyna deıin ashylady. Erbolat Dosaev úsh dene shynyqtyrý-saýyqtyrý kesheniniń qurylysy aıaqtalǵannan keıin balalarǵa arnalǵan barlyq sport seksıalary tegin bolatynyn atap ótti.
Búginde aýdan emhanalarynda josparly qýattyń artqany baıqalady. Qazirgi ýaqytta "Kemel" shaǵynaýdanynda 200 kelýshige arnalǵan otbasylyq-dárigerlik ambýlatorıanyń qurylysy júrgizilýde. Ákimdik aýdanda emhanalar ashý úshin 2 ǵımarat satyp aldy. Qala basshysy Jumysshy kentinde emhana ashý sheshimin qarastyrý jalǵasyp jatqanyn aıtty.
Almaty ákiminiń aqparaty boıynsha, aýdan turǵyndarynyń ótinishterin taldaý olardyń jartysyna jýyǵy ýchaskelerdi abattandyrýǵa nemese aýla aýmaqtaryn jóndeýge qatysty ekenin kórsetti. Bul máseleni sheshý úshin Erbolat Dosaevtyń tapsyrmasy boıynsha 2022 jylǵa arnalǵan «Halyqtyń búdjetke qatysýy» jobasyn qarjylandyrý 300 mln teńgege – 1,1 mlrd teńgege deıin ulǵaıtyldy. Turǵyndardyń usynystary boıynsha 23 joba irikteldi, onyń ishinde 3 iri joba – bular Chernovıskaıa kóshesindegi Esentaı ózeniniń, Kopernık kóshesindegi Kishi Almaty ózeniniń, Omarov kóshesinen Qazybaev kóshesine deıingi Qarasý ózeniniń jaǵalaýlary, saıabaqtarǵa, jaıaý júrginshiler aımaqtaryna jóndeý jumystaryn júrgizý, balalarǵa arnalǵan oıyn jáne sport,fýtbol alańdaryn jasaý qarastyrylǵan. Sondaı-aq, aýdanda "Gúlder" saıabaǵy men "Aınabulaq-1" jáne "Aınabulaq-3" shaǵynaýdandaryndaǵy gúlzarlardy aǵymdaǵy jóndeý jumystary josparlanǵan.
Qazirgi ýaqytta "Kókmaısa" shaǵynaýdandaǵy Esentaı ózeniniń jaǵalaýyna saıabaq salý jumystary júrgizilýde. Bıylǵy jyly Rysqulov/Súıinbaı dańǵyly boıyndaǵy kópir astynda jastardyń sporttyq parkiniń, "Aınabulaq-1" shaǵynaýdanyndaǵy Esentaı ózeniniń boıynda "Jastar" saıabaǵynyń qurylystaryn bastaý, "Kókjıek" shaǵynaýdanyndaǵy jáne M. Jumabaev kóshesi boıynda jaıaý júrginshiler aımaqtaryn salý josparlanǵan. "Kemel" shaǵynaýdanyndaǵy ózen jaǵalaýyna saıabaq salý josparlanǵan.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý, t.b máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes, jyl sońyna deıin Erbolat Dosaev halyqpen 24 kezdesý ótkizedi – toqsan saıyn 8 aýdannyń turǵyndarymen bir-bir kezdesý.
Eske salsaq, Almaty ákiminiń halyqpen alǵashqy kezdesýi Bostandyq aýdanynda 14 sáýirde, ekinshisi – 28 sáýirde Alataý aýdanynda, úshinshisi -12 mamyrda Áýezov aýdanynda, tórtinshisi - 19 mamyrda Naýryzbaı aýdanynda ótti.