Almaty qalasynyń ákimi E. Dosaev Túrksib aýdanyndaǵy jumys saparyn "Álmerek" shaǵynaýdanynan bastady. Munda qazirgi kezde áleýmettik ınfraqurylymdy damytýǵa qatysty máseleler ótkir tur, dep habarlaıdy Almaty-akshamy.kz
Jeke turǵyn úıdegi jumys istep turǵan dárigerlik ambýlatorıa (1980 jyly salynǵan) sanıtarlyq normalarǵa saı emes jáne jóndeýge múldem kelmeıdi, al 300 oqýshy orynǵa eseptelgen №195 jalpy bilim beretin mektep kún saıyn 741 oqýshyny qabyldaıdy. Kóshpeli keńes barysynda qala ákimi kún tártibinde turǵan máselelerdi sheshý jónindegi usynystarmen tanysty. Jaıly qalalyq orta basqarmasyna múddeli memlekettik organdarmen birlesip aǵymdaǵy jyly medısınalyq nysannyń qurylysyn jobalaýdy bastaý jáne basqa da áleýmettik nysandardyń: balabaqshanyń, sport jáne balalar alańdarynyń qurylysyn odan ári júrgizý máselesin pysyqtaý, sondaı-aq №195 mektepke qosymsha 450 oryndyq japsarjaıdyń qurylysyn jobalaý merzimin jedeldetý jáne aǵymdaǵy jyly qurylysty bastaý týraly tapsyrmalar berildi.
Turǵyndardy ortalyqtan sapaly sýmen jáne sý burýmen qamtamasyz etý maqsatynda bıyl shaǵynaýdanda ınjenerlik jelilerdiń II kezeńiniń qurylysy bastalady. Sýmen 287, sý burýmen 519 úıdi qamtý josparlanýda.
Jumys sapary barysynda qala ákimi «Avıator» stadıonynyń aýmaǵyn aralap kórdi. Sport nysany 3 gektar aýmaqta ornalasqan, al onyń basym bóligi bos. Osyǵan baılanysty dene shynyqtyrý-saýyqtyrý keshenin jobalaýdy bastaý týraly sheshim qabyldandy. Onyń seksıalaryna "Nurshashqan", "Álmerek" shaǵynaýdandarynyń, sondaı-aq áýejaı mańyndaǵy turǵyn úı alabynyń balalary tegin bara alady. Sondaı-aq, jumys istep turǵan stadıondy jańǵyrtýǵa erekshe nazar aýdarylady, ıaǵnı kórermender trıbýnalary men sheshinetin bólmeler boıynsha jumystar júrgiziledi, júgirý joly salynady.
Sondaı-aq, qala basshysy Ogarev kóshesindegi jumys istemeıtin burynǵy vedimistik balabaqshanyń aýmaǵyn paıdalaný josparlarymen tanysty. Onyń jer kólemi 2 gektardan asady. Qazirgi kezde árqaısysy 160 oryndyq memlekettik zamanaýı balabaqsha men balalardyń damý jáne shyǵarmashylyq ortalyǵynyń qurylysy jobalanýda. Osy shaǵynaýdanda 400-ge jýyq bala kezekte tur, al munda 280 oryndyq bir ǵana №185 memlekettik balabaqsha bar. Osyny eskere otyryp, qala ákimi jobalaý jumystaryn aǵymdaǵy jyldyń III toqsanynyń sońyna deıin aıaqtaý ári iske asyrý boıynsha tapsyrma berdi.
"Qaırat" shaǵynaýdanynda E. Dosaev 41 kóp páterli turǵyn úıdiń, 1500 oqýshyǵa arnalǵan jalpy bilim beretin mekteptiń qurylysymen, emhana men balabaqshany jobalaý barysymen tanysty. Aǵymdaǵy jyldyń sońyna deıin mektepti paıdalanýǵa berý, úılerdiń qurylysyn aıaqtaý jáne aǵymdaǵy jyly emhana men balabaqsha boıynsha qurylys-montaj jumystaryn bastaý josparlanýda.
Sýmen jabdyqtaý jáne káriz máselelerine erekshe nazar aýdaryldy. Ótken jyly munda sýmen jabdyqtaý jáne káriz jelileriniń qurylysy boıynsha negizgi jumystar aıaqtaldy. Alaıda, búginde 200-ge jýyq úı jobaǵa áli kirmegen. Qalanyń energotıimdilik jáne ınfraqurylymdyq damý basqarmasyna abonentterdi jelilerge qosý jumystaryn ústimizdegi jyldyń shildesine deıin aıaqtaý jáne ınjenerlik jelilerdiń qurylysyna kirisý tapsyryldy.
Megapolıs basshysy 30-shy jyldary salynǵan memlekettik tilde oqytatyn №59 mektep-gımnazıada boldy. Qazirgi kezde jobalyq qýaty 860 oryndy mektepte 1251 oqýshy bilim alýda. Aǵymdaǵy jyldyń aqpan aıynda mektep-gımnazıanyń janynan qosalqy nysan salý jónindegi jobalyq qujattama memlekettik saraptamanyń qorytyndysyn aldy. Qalalyq jaıly orta basqarmasyna rekonstrýksıadan soń sport alańyn abattandyrý úshin tıisti aýmaqty keńeıtý tapsyryldy.
Sondaı-aq, qala ákimi eski úılerdi renovasıalaý aıasynda salynyp jatqan úılerdiń qurylys barysymen tanysty. Saýranbaev, Moldaǵalıev, Chernyshevskıı, Tolstoı kósheleriniń kvadratynda 4 úı buzylyp, 3 úı salyndy, 7 úıdiń qurylysy jalǵasýda. Jalpy, Túrksib aýdanyndaǵy 606 úı renovasıa baǵdarlamasyna jatady, bul Almaty qalasyndaǵy eski turǵyn úılerdiń jalpy sanynyń 50%-yn quraıdy.
Aýdandy aralaý barysynda abattandyrý, sonyń ishinde Oqýshylar úıiniń janynda ornalasqan skverdi rekonstrýksıalaý jáne jańa rekreasıalyq aımaqtardy qurý boıynsha jobalar tanystyryldy.
Qala ákimi Túrksib aýdanynyń ákimi B. Aqjarovtyń jumysyn maquldady jáne «Shetsiz qala» baǵdarlamasy aıasynda aýdandy odan ári damytý boıynsha birqatar naqty tapsyrmalar berdi.