Almaty ákimi Erbolat Dosaev qaladaǵy almatylyqtardyń eń tanymal jáne súıikti jerleriniń biri ári keshendi abattandyrý jumystary aıaqtalyp qalǵan Saıran kóliniń aýmaǵyn aralap kórdi.
Jaǵajaı aımaǵy, jaıaý júrginshiler marshrýttary jáne belsendi demalys aımaqtary bar zamanaýı jaǵalaýdy qurý jobasy aýdany 47,6 ga ýchaskede iske asyrylýda.
Búgingi tańda jaǵalaý syzyǵyn nyǵaıtý, ınjenerlik jelilerdi salý jáne bóget salýdy qosa alǵanda, negizgi qurylys jumystary 80% - ǵa aıaqtaldy. Qazir jabyndy tóseý, shaǵyn sáýlet pishinderin ornatý jáne aýmaqty kógaldandyrý jumystary júrgizilýde.
Jumys sapary barysynda ákim trotýar bóligin abattandyrý boıynsha eskertýler berdi: plıtkalardy tóseý jobalyq belgiler men qurylys standarttary boıynsha tegis jáne jaıly ári qaýipsiz jasalyp, qalalyq ortanyń talaptaryna saı oryndalýy tıis ekeni jóninde eskertti. Sondaı-aq irgeles aýmaqtaǵy aǵashtarǵa kásibı orman-patologıalyq zertteý júrgizý jáne abattandyrýdyń biryńǵaı landshafttyq tujyrymdamasy aıasynda jańa kóshetter otyrǵyzýdy qamtamasyz etý tapsyryldy.
Jol berilgen buzýshylyqtarǵa baılanysty Erbolat Dosaev tehnıkalyq qadaǵalaýdy júzege asyratyn «Rremier Expert» JSHS kompanıasymen shartty buzýdy tapsyrdy. Merdiger uıymdarǵa jumystardyń oryndalý merzimderi men sapasyna baqylaýdy kúsheıtý qatań kórsetildi. Jaýapty vedomstvolarǵa barlyq jumystardyń aıaqtaý merzimi - 2025 jyldyń mamyr aıynyń sońyna deıin belgilendi. Joba merzimder men joǵary sapa standarttary qatań saqtalǵan jaǵdaıda ǵana qabyldanady. Sondaı-aq, Almaty qalasynyń Qoǵamdyq keńistikterdi damytý basqarmasyna eskertýler men naqty tapsyrmalar berildi. Jobanyń iske asyrylý barysyn baqylaý ákimniń jeke baqylaýynda bolady.
Eske salsaq, Saıran sý qoımasyn rekonstrýksıalaý 2024 jyldyń aqpan aıynda bastalǵan bolatyn. Jumys aıaqtalǵannan keıin almatylyqtar qala ortalyǵynda biregeı rekreasıalyq keńistik alady. Jańartylǵan jaǵalaý kóldiń eki aýmaǵyn uzyndyǵy 2,5 km bolatyn biryńǵaı serýendeý aımaǵyna qosady. joba boıynsha alańda oryndyqtar, lotos bar sý qoımasynyń janyndaǵy pergolalar, fýdkorttar, skeıtpark, fýtbol alańy, parkýr alańdary, roller, velopark, balalar qalashyǵy, ıtterdi serýendetýge arnalǵan aımaq, qoǵamdyq dárethanalar jáne táýlik boıǵy beınebaqylaý júıesi paıda bolady. Eki polısıa beketi men eki qutqarý beketi salynady.
1971 jyldan beri alǵash ret Saıran naǵyz ózgeristi bastan ótkerýde-bul aýmaqtyń búkil ómirindegi alǵashqy keshendi jańarýy. 2023 jyly 50 jylda alǵash ret sý qoımasynyń túbi tazartyldy-140 myń tekshe metrden astam laı jáne 28 tonna turmystyq qoqys syrtqa shyǵaryldy.