Polısıa JI arqyly jasalatyn alaıaqtyq týraly eskertti.
Jasandy ıntellekt tehnologıalarynyń damýyna baılanysty alaıaqtar azamattardy aldaýdyń jańa tásilderin ıgerip jatyr, dep habarlaıdy aqshamnews.kz Polisia.kz-ke silteme jasap.
Olar endi daýys kóshirmesin jasap, jalǵan vıdeolar qurastyryp, tanys adamdardyń beınesin ımıtasıalap, tipti neırojeliler arqyly jeke akkaýnttardy buzyp kire alady. Osyǵan baılanysty Jambyl oblysy polısıa departamentiniń qyzmetkerleri aımaqtaǵy turǵyndardy jańa qaýipterden saqtaý maqsatynda profılaktıkalyq jumystardy kúsheıtti. Polıseıler mektepterge, joǵary oqý oryndaryna, uıymdarǵa jáne turǵyn úı keshenderine baryp, aqparattyq paraqshalar taratyp, alaıaqtardyń qurbany bolmaýdyń joldaryn túsindirýde.
– Buryn qylmyskerler bankter men polısıa atynan habarlasatyn bolsa, qazir olar jaqyn týystaryńyzdyń daýsyn kóshirip, shuǵyl túrde aqsha aýdarýdy suraýy múmkin. Sonymen qatar jasandy ıntellekt kómegimen sizdiń atyńyzdan jalǵan vıdeo jasap, shantajben aınalysady. Bul tehnologıalar alaıaqtyqty shynaıy etip kórsetetindikten, asa saq bolý qajet, – dep atap ótti Jambyl oblysy PD kıberqylmyspen kúres basqarmasynyń bastyǵy Ýálıhan Aǵybaev.
Jasandy ıntellekt arqyly jasalatyn alaıaqtyqtyń qurbany bolmaý úshin ne isteý kerek?
Jaqyndaryńyzǵa qaıta qońyraý shalyńyz – eger kómek suraǵan kúmándi daýys habarlamasy kelse, onyń rasynda jaqynyńyz ekenin anyqtap alyńyz.
Alaıaqtar daýysty uqsatyp jasap alady. Aýdıo nemese vıdeo habarlamalar arqyly aqsha jibermeńiz – ol tanysyńyzdan kelgendeı kórinýi múmkin. Aldymen basqa baılanys tásilimen naqtylap alyńyz.
Messendjerlerdegi shuǵyl ótinishterge senbeńiz – ásirese, jaǵdaıdyń shuǵyl ekenin aıtyp, sendirýge tyrysqan sátte. Alaıaqtar akkaýnttardy buzyp, dostaryńyzdyń atynan hat jaza alady.
Kúdikti siltemeler men faıldardy ashpańyz – alaıaqtar JI arqyly jalǵan bank saıttaryn jasap, sol arqyly sizdiń jeke derekterińizdi alýy múmkin. Aqparatty tekserińiz – eger sizge kúmán týdyratyn vıdeo nemese daýys habarlamasy kelse, ony resmı derekkózderden tekserýge tyrysyńyz.
Eki faktorly aýtentıfıkasıany ornatyńyz – bul áleýmettik jeliler men messendjerdegi akkaýnttaryńyzdy buzylýdan qorǵaıdy.
"Jeńil tabys" týraly usynystardan saq bolyńyz – alaıaqtar JI arqyly avtomattandyrylǵan hat-habar taratyp, ınvestısıalyq sqemalar, utystar men qarjylyq aıla-sharǵylar usynýy múmkin.
Polısıa jasandy ıntellekt tehnologıalaryn qoldanatyn alaıaqtarǵa tap bolsańyz, dereý "102" nómirine habarlasýǵa shaqyrady.