Aýrýhanada 20 beıin boıynsha 18 klınıkalyq bólimshe bar
Almaty ákimi Ortalyq qalalyq klınıkalyq aýrýhananyń qyzmetkerlerimen kezdesip, Telemedısına ortalyǵy men medısınalyq mekeme bólimsheleriniń jumysymen tanysty dep habarlaıdy Almaty-akshamy.kz.
Erbolat Dosaev aýrýhana qyzmetkerlerine qańtardaǵy qaıǵyly oqıǵalar kezinde qyzmettik boryshyn kásibı atqarǵany úshin alǵys aıtty.
Qyzmetkerler jaraqat alǵandar men zardap shekkenderge, áskerı jáne azamattyq tulǵalarǵa bas súıek-mı jáne atys jaraqattary bar adamdarǵa kómek kórsetti.
Qańtardyń qaıǵyly oqıǵalary kezinde klınıkaǵa barlyǵy 300-den astam zardap shekkender júgindi. Dárigerler 250-den astam operasıa jasady. Kóptegen pasıentterge olardyń jaǵdaıyn turaqtandyrý jáne ómirge qaýip tóndirmeý úshin alǵashqy shuǵyl ota jasaldy.
Kezdesý barysynda qala basshysy qabyldaý bóliminiń, ota zalynyń, reanımasıa jáne oftalmologıalyq bólimsheniń jumysymen tanysty.
Almaty ákimi balalarǵa shuǵyl medısınalyq kómek kórsetý ortalyǵynyń jańa korpýsy qurylysynyń barysyn baǵalady. Nysandy jyl sońyna deıin paıdalanýǵa berý josparlanýda.
Kezdesý sońynda E. Dosaev medısınalyq mekeme jáne Qoǵamdyq densaýlyq basqarmasynyń basshylyǵymen ózekti máselelerdi jáne odan ári damý josparlaryn talqylady.
Anyqtama úshin:
Ortalyq qalalyq klınıkalyq aýrýhana – Almaty qalasyndaǵy eń iri kópbeıindi stasıonarlardyń biri. Munda jalpy 655 tósek-oryn qory bar.
Aýrýhanada 20 beıin boıynsha 18 klınıkalyq bólimshe jáne 1224 negizgi qyzmetker, onyń ishinde 231 dáriger jáne 451 meıirbıke jumys isteıdi.
Balalarǵa shuǵyl medısınalyq kómek kórsetý ortalyǵy – Almaty qalasy men respýblıkanyń barlyq turǵyndaryna táýlik boıy bilikti jáne joǵary mamandandyrylǵan medısınalyq jáne dıagnostıkalyq shuǵyl ári josparly kómek kórsetetin iri kópbeıindi klınıka.
Qazirgi ýaqytta stasıonarda 275 tósek oryn bar. Aýrýhananyń joǵary bilikti mamandary – 4 medısına ǵylymdarynyń kandıdaty, 43 dárigerdiń joǵary jáne birinshi biliktilik sanattary bar.