Almaty ákimi Erbolat Dosaevtyń halyqpen alǵashqy kezdesýi Bostandyq aýdanynda ótti. İs-sharaǵa aýdannyń 700-den astam turǵyny keldi dep habarlaıdy Almaty-akshamy.kz.
«Men birinshi kezdesýdi Bostandyq aýdanynda ótkizýdi uıǵardym, óıtkeni bul bizdiń qalamyzdyń eń iri aýdany, onda 365 myń adam nemese Almaty halqynyń 18%-y turady», – dedi qala basshysy óziniń sózinde.
Almaty ákiminiń aqparaty boıynsha, Bostandyq aýdany áleýmettik-ekonomıkalyq kórsetkishter boıynsha qalanyń 19,7% jumyspen qamtylýyn qamtamasyz etedi. Aýdan búdjetke salyq túsimderiniń 24% qamtamasyz etedi, ınvestısıalar tartý boıynsha I oryn alady (aǵymdaǵy jyldyń qańtar-aqpan aılarynda ınvestısıalar kólemi 13,2%-ǵa ósti jáne 42,2 mlrd teńgeni qurady). Turǵyndardyń negizgi bóligi SHOB salasynda jumys isteıdi – bul jumyspen qamtylǵan halyqtyń 66,5%-y. Aǵymdaǵy jyly aýdanda 7 myńnan astam jańa jumys ornyn qurý josparlanýda.
Halyqpen kezdesý barysynda Erbolat Dosaev ekonomıkalyq kórsetkishterdiń aıtarlyqtaı joǵary bolýyna qaramastan, aýdanda turǵyn úı qurylysy, áleýmettik ınfraqurylym, qoǵamdyq keńistikter, abattandyrý, áleýmettik qoldaý jáne t.b. boıynsha jınaqtalǵan máselelerdiń sheshilmegen kúıinde qalyp otyrǵanyn, olardy sheshý keshendi jáne júıeli tásildi talap etetinin atap ótti.
Áleýmettik nysandardyń jetispeýshiligi máselesin sheshý, onyń ishinde mektepterdegi oryn tapshylyǵyn tómendetý úshin qosymsha qurylys salý tájirıbesi jalǵasatyn bolady, jańa mektepter salý úshin ákimdik ǵımarattar men jer ýchaskelerin jeke menshik ıelerinen satyp alýdy josparlap otyr.
Halyqqa sapaly medısınalyq qyzmet kórsetýdi qamtamasyz etý maqsatynda ál-Farabıden joǵary jer ýchaskesin emhana qurylysyna jeke menshik ıelerinen satyp alý jóninde kelissózder júrgizilýde. Sondaı-aq, jyl sońyna deıin «Balalarǵa shuǵyl medısınalyq kómek kórsetý ortalyǵynyń» jańa korpýsynyń qurylysy aıaqtalady, onda zamanaýı qabyldaý bólmesi, reanımasıa, operasıalyq jáne neırohırýrgıalyq bólimsheler men tolyq medısınalyq jaraqtandyrylǵan klınıkalyq zerthana ornalastyrylady.
Jumys isteıtin múgedekterdi qoldaý úshin aǵymdaǵy jyldyń basynan beri áleýmettik jumys oryndaryn sýbsıdıalaý mólsheri 63 myńnan 92 myń teńgege artty, bul maqsatqa 405 mln teńge (980 oryn) bólindi. Múmkindigi shekteýli jandar úshin áleýmettik ınfraqurylym nysandarynyń qoljetimdiligi máselelerin sheshý boıynsha 72 nysandy beıimdeý josparlanǵan.
Búginde Bostandyq aýdanynda «Mega sentr», «ADK» saýda ortalyqtarynyń janynda, burynǵy jemis-konservi kombınatynyń aýdanynda, sondaı-aq Sátpaev-Baıtursynov-Buqar jyraý-Esentaı ózeniniń aýmaǵynda turǵyn úı qurylysy erekshe qarqyndy júrgizilýde. Osyǵan baılanysty áleýmettik ınfraqurylym obektilerin mindetti salý jónindegi talaptardy eskere otyryp, aýmaqtarda qurylys salý tásilderi qaıta qaraldy.
Aǵymdaǵy jyly jaılylyqty damytý jáne «halyqtyń búdjetke qatysýy» jobasy aıasynda qalanyń abattandyrylýyn jaqsartý úshin Bostandyq aýdanyn qarjylandyrý kólemi 58%-ǵa 766 mln teńgege deıin ulǵaıtyldy (2021 jyly 483,8 mln.teńge). Balalar jáne sport alańdaryn, býlvarlardy, №10 mektepti, Tımırázev kóshesindegi jaıaý júrginshiler aımaǵyn, jasyl aımaqtarǵa arnalǵan sýarý sý qubyrlaryn aǵymdaǵy jóndeý josparlanýda. 80 aýla aýmaǵyna kúrdeli jóndeý júrgiziledi.
Turǵyndar «Iýjnyı» saıabaǵyn qala menshigine qaıtarý, qala ishindegi baý-baqsha seriktestikteriniń aýmaqtaryn qalalyq aýmaqtar sanatyna aýystyrý, shyǵarmashylyq úıirmeler men sport seksıalaryn jan basyna qarjylandyrý jáne t. b. máselelerdi kóterdi.
Turǵyndarmen kezdesý 3 saǵatqa sozyldy. Qala basshysy turǵyndardyń 200-den astam ózekti suraqtaryna jaýap berdi. Kezdesý qorytyndysy boıynsha naqty tapsyrmalar berildi, merzimder men jaýapty bólimsheler belgilendi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes, jyl sońyna deıin Erbolat Dosaev halyqpen 24 kezdesý – ıaǵnı, toqsan saıyn 8 aýdannyń turǵyndarymen bir kezdesýden ótkizedi.