Qamaýǵa Muhtar Bazarbaev alyndy.
«Alan Parking» JSHS -niń dırektory Muhtar Bazarbaev eki aıǵa qamaýǵa alyndy. Bul týraly Almaty sotynyń baspasóz qyzmeti málim etti, dep habarlaıdy Almaty-akshamy.kz QazAqparatqa silteme jasap.
«Tıisti qaýlysymen sotqa deıingi tergeý organynyń ótishi qanaǵattandyryldy. Kúdiktige 2 aı merzimine qamaýda ustaý bultartpaý sharasy sanksıalandy»,- dep habarlady Almaty sotynyń baspasóz qyzmeti.
Buǵan deıin Qaırat Boranbaev ustalǵan bolatyn. Qarjylyq monıtorıń agenttigi kvazımemlekettik sektorda asa iri kólemde qarajat jymqyrý faktisi boıynsha qylmystyq isti tergep jatyr. Kúdikke ilingen Q.S. Boranbaev ýaqytsha ustaý ızolátoryna qamaldy.
Aıta keteıik, 2016 jyly Almatyda avtomattandyrylǵan aqyly kólik qoıatyn turaq júıesi iske qosyldy. Atalǵan qyzmettiń eki túri bar: kólikti kóshe boıyna qoıý jáne turaq alańdary. Barlyǵy bir operatorǵa tıesili. Ol – Alan Parking JSHS. Oǵan 12 myń turaq qaraıdy. Avtoturaqtyń basym bóligi ortalyq kóshelerde ornalasqan. Aqyly turaqtyń baǵasy saǵatyna 100 teńge turady. Úsh túrli tólem júıesi arqyly eseptesýge bolady. Ol parkomat, kıvı-ámıan jáne SMS joldaý arqyly.