Saırandy kórkeıtý, 4 jańa qoǵamdyq keńistik qurý, 141 aýlaǵa jóndeý júrgizý: Áýezov aýdany qalaı ózgerýde
2025 jyldyń maýsym aıynda Almatynyń Áýezov aýdanynda tórt jańa qoǵamdyq keńistiktiń qurylysy aıaqtalady. Bul týraly Almaty ákimi Erbolat Dosaev Áýezov aýdanynyń turǵyndarymen kezdesý barysynda málimdedi.
«2025 jyldyń maýsym aıynda 4 qoǵamdyq keńistikti kórkeıtý jumystaryn aıaqtaýdy josparlap otyrmyz: Aqsaı-4 jáne 12-shaǵyn aýdandaryndaǵy skverler, Mamyr-4 jáne Jetisý-3 shaǵyn aýdandaryndaǵy jaıaý júrginshiler aımaqtary. Bul jobalar aıasynda jańa balalar jáne sport alańdary, kóshe jıhazdary, demalysqa arnalǵan kúrkeler ornatylyp, jaryqtandyrý jańartylady jáne jasyl jelekter egiledi», – dedi Almaty ákimi.
Kóriktendirýdiń negizgi jobalarynyń biri – Áýezov aýdanyn da qamtıtyn Saıran kólin jańartý jumystary.
«2024 jyldyń sońynda negizgi qurylys jumystary aıaqtaldy, al bıylǵy mamyr aıynda jobanyń sońǵy kezeńi támamdalady. Saıran kóli qala turǵyndary men qonaqtary úshin eń tartymdy demalys oryndarynyń birine aınalady dep senemin», – dedi Erbolat Dosaev.
Sonymen qatar, Ótegen batyr jáne Jubanov kósheleri «qasbetten qasbetke deıin» qaǵıdaty boıynsha kórkeıtilip, kógaldandyrylýda. Bul kóshelerde demalys pen sportqa arnalǵan jaıly aımaqtar jasalyp, beınebaqylaý kameralary, shamdar, qoqys jáshikteri men balalar oıyn alańdary ornatylady. Sondaı-aq, jaıaý júrginshiler men avtoturaq aımaqtary kóriktendiriledi. Jobany 2025 jyldyń qazanyna deıin aıaqtaý josparlanǵan.
«Halyq qatysatyn búdjet» baǵdarlamasy belsendi túrde júzege asyrylýda. 2024 jyly jalpy somasy 2,8 mlrd teńge bolatyn 57 joba iske asyryldy. 2025 jyly 30 jobany júzege asyrý úshin qala búdjetinen 2 mlrd teńge bólindi. Turǵyndardan túsken 727 ótinimniń ishinen daýys berý nátıjesinde 30 joba tańdaldy, onyń 20-sy qoǵamdyq keńistikterdi kórkeıtýge, al 10-y aýlalardy jóndeýge baǵyttalǵan.
Sonymen qatar, Áýezov aýdanynda aýlalardy kúrdeli jóndeý jumystary jalǵasýda. 2024 jyly jalpy somasy 1,6 mlrd teńgege 23 aýlaǵa kúrdeli jóndeý júrgizildi, al 115 aýlada 470 mln teńge kóleminde aǵymdaǵy jóndeý jumystary jasaldy. 2025 jyldyń mamyr aıynda taǵy 23 aýlany kúrdeli jóndeýmen jáne 118 aýlany aǵymdaǵy jóndeýmen qamtý josparlanyp otyr, al bul jumystar 2025 jyldyń qyrkúıeginde aıaqtalady.