Almaty ákimi Darhan Satybaldy jumys sapary aıasynda «Aqparattyq tehnologıalar parki» arnaıy ekonomıkalyq aımaǵynda («ATP» AEA) ornalasqan kásiporyndardy aralap, óndiristik áleýetimen tanysty. Bul kásiporyndar elektronıka, telekomýnıkasıa jáne medısınalyq jabdyqtar óndirisine baǵyttalǵan.
Búginde AEA aýmaǵynda 60-tan astam shaǵyn jáne orta bıznes sýbektisi jumys isteıdi. Olardyń qatarynda óndiristi jergiliktendirý deńgeıi joǵary, eksporttyq áleýeti bar kompanıalar da bar. Qala basshylyǵyna aımaqtyń negizgi damý kórsetkishteri men jospar tanystyryldy.
Alǵash tanystyrylǵan nysan jylý, sý, elektr qýaty men gazdy esepteýge arnalǵan qurylǵylar shyǵaratyn NERO kompanıalar toby boldy. Kásiporyn 1600 sharshy metr aýmaqta ornalasqan. Jalpy ınvestısıa kólemi 1,5 mlrd teńge. Munda 65 adam turaqty jumyspen qamtylǵan. Kompanıanyń ónimderi respýblıka kóleminde keń qoldanylady. Atap aıtqanda, «Alataý Jaryq Kompanıasy» AQ jáne Shymkent qalasyndaǵy «Qýat Jylý Ortalyq – 3» mekemesimen birlesken jobalarda paıdalanylady.
Keıin shahar basshysy XFinity Solutions kompanıasynyń tynys-tirshiligimen tanysty. Bul kásiporyn 2024 jyly álemge tanymal Acer brendiniń kompúterlik tehnıkalaryn jergilikti jerde qurastyrý isin qolǵa alǵan. Jylyna 100 myń dana tehnıka shyǵara alady. Qazir 70 adam jumys isteıdi. Munda Microsoft baǵdarlamalarymen jabdyqtalǵan noýtbýkter, monobloktar men júıelik bloktar jasalady. Kompanıa XFinity Group halyqaralyq holdıńiniń quramyna kiredi, TMD men Ortalyq Azıa naryǵynda sátti jumys istep keledi.
Sapar aıasyndaǵy kelesi nysan 2024 jyldyń qarasha aıynan bastap telekomýnıkasıalyq qurylǵylar – komýtatorlar, modemder, IP-telefondar men teledıdar prıstavkalaryn óndire bastaǵan SMART ALATAU zaýyty. Munda 60 qyzmetker eńbek etip jatyr. Jyldyq qýaty – 300 myń dana ónim shyǵarý.
Sapar sońynda ákim Juldyz Kenan Co., LTD kompanıasyna bardy. Kásiporyn kateter men zondtan bastap, betperde, sondaı-aq, pedıatrıa jáne hırýrgıaǵa arnalǵan ónimge deıin ártúrli medısınalyq buıymdar shyǵarady. 2025 jyly aqpan aıynda iske qosylǵan zaýyt jylyna 10 mıllıon dana ónim óndiredi. Jobanyń ınvestısıa kólemi 2,1 mlrd teńge. Munda 120 adam nápaqasyn aıyryp júr.
Sapar qorytyndysy boıynsha Darhan Satybaldy joǵary tehnologıaly jáne ımport almastyratyn óndiristerdi damytý, eksporttyq baǵyttaǵy kásiporyndardy qoldaý, sondaı-aq, jańa, sapaly jumys oryndaryn ashý ákimdik jumysynyń basty basymdyqtarynyń biri ekenin aıtty.
Sonymen qatar ol aıaqtalmaǵan qurylys nysandaryna tehnıkalyq aýdıt júrgizip, olardyń bolashaǵyna qatysty naqty usynystar ázirleýdi tapsyrdy. Usynysta iske asyrý merzimi men ınvestısıa tartý múmkindikteri de kórinis tabýǵa tıis.
«Qazirgi jaǵdaıǵa taldaý jasaý mańyzdy. Kim belsendi jumys istep jatyr, kim áli de toqtap tur, al kim jer telimin alǵanymen, qurylys jumystaryn bastamaǵan. Osynyń bári naqty, ádil baǵalanýy qajet. Qabyldanatyn sheshimder tıimdilikke negizdelýge tıis», – dedi Darhan Satybaldy.
Sondaı-aq, ol Almatyda suranysqa ıe otandyq taýar óndirýshilerdi qoldaýdyń mańyzyn atap, ınvestısıa tartý men qosylǵan quny joǵary óndiristik aımaqtardy damytý baǵytynda júıeli jumys isteýge daıyn ekenin bildirdi.