Almaty ákimi Erbolat Dosaevtyń halyqpen kezekti kezdesýi Almaly aýdanynda ótti. Qala basshysy aýdannyń damýy jáne turǵyndardan kelip túsken usynystar boıynsha atqarylǵan jumystar týraly aıtty. Kezdesýge 280-nen astam adam keldi, dep habarlaıdy Almaty-akshamy.kz.
Qala ákimi Erbolat Dosaev atap ótkendeı, aýdannyń negizgi máselesi elektrmen jabdyqtaý bolyp qala beredi. Jaǵdaıdy sheshý úshin 2022-2023 jyldarǵa arnalǵan qalanyń elektr júıesin jańǵyrtý jobasy iske asyrylýda. Almaly aýdany boıynsha eki jyl ishinde rezervtik qýattardy 10 kVt-qa deıin ulǵaıta otyryp, 156 km eskirgen kabeldik jelilerdi aýystyrý jáne 13 taratý jáne 195 transformatorlyq qosalqy stansıalardy qaıta jańartý kózdelgen. Búgingi tańda 55 km kabel jelileri aýystyrylyp, 8 taratý jáne 42 transformatorlyq qosalqy stansıalar jańardy. Jobany iske asyrý qorytyndysy boıynsha aýdannyń elektr jelileriniń ortasha tozýy 70-ten 56%-ǵa deıin tómendeıdi.
Jaýyn-shashyn kezinde sý basý aýdanda ózekti másele bolyp qalýda. Aýdan boıynsha turaqty sý basýdyń 12 ýchaskesi anyqtaldy. TJ jelisi boıynsha problemany sheshý úshin jyl sońyna deıin Maqataev kóshesiniń boıyndaǵy 3,6 km kolektordy qalpyna keltirý, 2,3 km aryq jelilerin jáne Raıymbek dańǵylynyń boıyna 1,6 km kanal salý qarastyrylǵan. Sonymen qatar, kúzde 52 ýchaskede 34 km aryq jelisin qaıta qurý jáne salý jumystary bastalady, ol 2024 jyldyń sońyna deıin jalǵasady.
Joldardyń paıdalaný sıpattamalaryn jaqsartý úshin jalpy uzyndyǵy 4,7 km 8 kósheni ortasha jóndeý aıaqtaldy, sondaı-aq 14 mekenjaıda trotýar jelisiniń qurylysy boıynsha jumystar júrgizildi. Aǵymdaǵy jyldyń qarasha aıyna deıin jalpy uzyndyǵy 10,2 km bolatyn taǵy 10 kóshe qosymsha ortasha jóndeletin bolady.
Oqýshy oryndarynyń tapshylyǵyn tómendetý maqsatynda qyrkúıek aıynda Qabanbaı batyr kóshesinde 850 oryndy Prometheus school jeke bilim berý mektebin ashý josparlanýda. №15 gımnazıany kúrdeli jóndeý jumystary júrgizilýde,ol 2023 jyldyń shilde aıynda aıaqtalady.
Mektepke deıingi oryndar tapshylyǵy máselesin sheshý úshin jyl basynan beri 225 oryndy 3 jekemenshik balabaqsha ashyldy. 30 tamyzǵa deıin №7 balabaqshanyń seısmoturaqtylyǵyn kúsheıtý jumystary aıaqtalady. Áıteke bı-Máýlenovtegi burynǵy balabaqsha ǵımaraty jalǵa berýden qaıtaryldy. Jyl sońyna deıin kúrdeli jóndeýge JSQ ázirlenedi. QMJ 2023 jyldyń ekinshi toqsanynda bastalady.
«Nurly jer» turǵyn úı-kommýnaldyq sharýashylyqty damytý baǵdarlamasy boıynsha jyl basynan beri 22 úıde 57 lıft aýystyryldy. Jyl sońyna deıin 3 úıde taǵy 8 lıft aýystyrylatyn bolady.
Sondaı-aq, eski úılerdi renovasıalaý baǵdarlamasy boıynsha bıyl Seıfýllın - Tóle bı, Sháripov-SHevchenko kóshelerindegi 4 úı turǵyndarynyń turǵyn úı jaǵdaıy jaqsardy. Tarıhı biregeılikti saqtaý úshin aǵymdaǵy jyldyń basynan beri 10 shaǵyn qabatty turǵyn úıdiń qasbetteri jóndeldi. Aǵymdaǵy jyldyń qazan aıyna deıin 34 úıdiń jóndeý jumystaryn aıaqtaý josparlanýda.
«Halyq qatysatyn búdjet» baǵdarlamasy aıasynda aýdan boıynsha jyl sońyna deıin 34 joba júzege asyrylady. Olardyń ishinde – ARO saıabaǵyn avtomatty sýarý jáne kógaldandyrý júıesi, AZTM saıabaǵyndaǵy ıtterdi serýendetýge arnalǵan alań, Bógenbaı batyr býlvaryn Seıfýllın dańǵylynan Sháripov kóshesine deıin abattandyrý, Dosmuhamedov kóshesi, 68 jáne Anosov kóshesi, 37 eki aýlany jóndeý qarastyrylǵan.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý jáne t.b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes jyl sońyna deıin Erbolat Dosaev halyqpen 24 kezdesý ótkizedi – toqsanyna 8 aýdannyń turǵyndarymen bir-bir kezdesý.