Almaty ákimi Erbolat Dosaevtyń halyqpen ekinshi kezdesýi Alataý aýdanynda ótti. İs-sharaǵa 600-den astam aýdan turǵyndary keldi dep habarlaıdy
«Almaty ákimi laýazymyna taǵaıyndalǵannan keıin men alǵashqy jumys saparymdy Alataý aýdanyna jasadym. Qazirgi ýaqytta aýdanda 318 myń adam nemese qala halqynyń 15,8%-y turady, aýdan qalada halyq sany boıynsha ekinshi orynda», - dedi Erbolat Dosaev óziniń sózinde.
Almaty ákiminiń málimetinshe, Alataý aýdanynyń damý áleýeti zor. Onyń aýmaǵynda Almatynyń ındýstrıaldy aımaǵy ornalasqan, onda búginde 113,7 mlrd teńge ınvestısıa tarta otyryp, 19 joba iske asyryldy. Aǵymdaǵy jyly 822 jumys ornyn qurýmen jańa 10 óndiristi iske qosý josparlanýda, bul búdjettiń salyq túsimderine oń áser etedi. Jalpy, aǵymdaǵy jyly aýdanda 8 myńǵa jýyq jańa jumys ornyn qurý josparlanýda.
Halyqpen kezdesý barysynda Erbolat Dosaev aýdannyń negizgi problemalyq máselelerin, sonyń ishinde sapaly aýyz sýmen, kárizben jáne jol jabynymen, áleýmettik ınfraqurylymmen, abattandyrýmen, qoǵamdyq kólikpen jáne t. b. qamtamasyz etýdi atady.
Áleýmettik nysandardyń jetispeýshiligi máselesin sheshý úshin jańa medısınalyq mekemelerdiń, mektepter men balabaqshalardyń qurylysy jalǵasady. Mektepterde oryn tapshylyǵyn tómendetý maqsatynda oqý jylynyń basynda «Saıaly» jáne «Tomırıs» shaǵyn aýdandarynda 3 300 oryndy 2 oqý orny (№204, 205 mektepter) paıdalanýǵa beriledi. 4 500 oryndy taǵy 3 mektep boıynsha qurylys jumystaryn bir jylǵa deıin aıaqtaý josparlanýda. Mektepke deıingi mekemelerde oryn jetispeýshiligin qysqartý maqsatynda bıyl 2 balabaqsha – «Nurkent» shaǵyn aýdanynda 320 oryndy jáne «Saıaly» shaǵyn aýdanynda 160 oryndy salý josparlanǵan.
Halyqty sapaly medısınalyq qyzmetpen qamtamasyz etý maqsatynda aǵymdaǵy jyly Saıaly jáne Qarasý shaǵyn aýdandandarynda árqaısysy 200 kelýshige arnalǵan otbasylyq-dárigerlik ambýlatorıalar salý josparlanýda. Kelesi jyly Alǵabs shaǵyn aýdannyń 19 000 turǵynyna jáne Terekti shaǵyn aýdany turǵyndarynyń bir bóligine qyzmet kórsetýge eseptelgen alǵashqy medısınalyq-sanıtarlyq kómek Ortalyǵynyń qurylysyn bastaý josparlanǵan. Stasıonarlyq kómek qyzmetteriniń tapshylyǵyna baılanysty 2023-2025 jyldary kópbeıindi aýrýhana salý josparlanýda. Medısınalyq mekemede perzenthana, dıagnostıkalyq jáne ońaltý ortalyqtary bolady.
Aýdannyń ótkir máseleleriniń biri baǵyttyq jeliler men jyljymaly quramnyń jetispeýshiligi bolyp tabylady. Qala basshysynyń málimetinshe, máseleni sheshý úshin alty shaǵyn aýdanda 3 jańa baǵyt ashylyp, 4 baǵyt uzartylyp, kúsheıtiledi (№109, 129, 25, 57), sondaı-aq №115 baǵyttyń barlyq jyljymaly quramy jańartyldy. Bıyl avtobýs aıaldamalarynyń tapshylyǵyn tolyǵymen sheshý josparlanǵan - 50 aıaldama kesheni salynady.
Jaılylyq jasaý jáne qalany abattandyrýdy jaqsartý maqsatynda 2019 jyldan bastap Almatyda «Halyqtyń búdjetke qatysýy» baǵdarlamasy iske asyrylýda. Sońǵy 2 jylda aýdanda bos jatqan 60 ýchaskeni abattandyrý jáne kógaldandyrý jumystary júrgizildi – balalar oıyn alańdary, vorkaýt alańdary, sport keshenderi, jaıaý júrginshiler jáne jasyl aımaqtar salyndy. Aǵymdaǵy jyldyń naýryz aıynda osy joba aıasynda Almaty ákiminiń usynysy boıynsha Alataý aýdany úshin qarjylandyrý kólemi 500 mln teńgeden 1,8 mlrd teńgege deıin ulǵaıtyldy.
Bıylǵy jyly turǵyndardyń usynystary boıynsha balalar jáne sport alańdaryn, Momyshuly kóshesi boıynda kórý alańyn, Rahat-Mádenıet, Saıaly, Qarasý, Shapaǵat shaǵyn aýdandarynda fýtbol alańdaryn jáne jasyl aımaqqa arnalǵan sýarý júıelerin slaý boıynsha 36 joba aıqyndaldy.
Turǵyndar joldardyń sapasy men jóndeý, sýmen qamtamasyz etý, káriz, elektr jelileriniń jaǵdaıy jáne t. b. máselelerdi kóterdi.
Halyqpen kezdesý 3 saǵattan astam ýaqytqa sozyldy. Qala basshysy turǵyndardyń 150 ózekti suraqtaryna jaýap berdi. Kezdesý aıasynda naqty tapsyrmalar berildi, ákimdiktiń jaýapty bólimsheleri bekitilip, merzimderi belgilendi.
Memleket Basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes Almaty qalasynyń ákimi Erbolat Dosaev qalanyń barlyq aýdandarynyń turǵyndarymen toqsan saıyn kezdesetin bolady.
Eske salsaq, Almaty ákiminiń halyqpen alǵashqy kezdesýi 14 sáýirde Bostandyq aýdanynda ótken bolatyn.