Almaty ákimi Darhan Satybaldy jumys sapary aıasynda Alataý aýdanynyń Rahat-Mádenıet jáne Alǵabas shaǵynaýdandaryna baryp, turǵyndarmen kezdesip, ınjenerlik jáne jol ınfraqurylymy máselelerin talqylady.
Rahat-Mádenıet shaǵynaýdanynda Alataý aýdany ákimi apparatynyń tapsyrysymen «Sapa Qurylys 2007» JSHS merdiger uıymy qurylys-montaj jumystaryn júrgizýde. Joba aıasynda jalpy uzyndyǵy 131 shaqyrym ınjenerlik jeli salý qarastyrylǵan, onyń ishinde 69 shaqyrym sý qubyry jáne 61 shaqyrym káriz jelisi. Búgingi kúni 101 shaqyrym (53,7 shaqyrym sý qubyry jáne 47 shaqyrym káriz jelisi) tartyldy. Jumystardy 2025 jyldyń qarashasynda aıaqtaý josparlanǵan.
Sonymen qatar, Energetıka jáne sýmen jabdyqtaý basqarmasy shaǵynaýdandy turaqty elektr qýatymen qamtamasyz etý jobasyn júzege asyrýda. Qazirgi ýaqytta 13 transformatorlyq qosalqy stansa men 1 qosalqy taratý stansasy ornatylýda. Bıylǵy jyly 5 qosalqy stansa iske qosylady. Nátıjesinde ortalyq jelilerge 2 882 abonent qosylyp, shamamen 14 myń turǵyn sapaly elektr qýatymen qamtylady.
Ákim barlyq jumystardy jedeldetýdi, sondaı-aq basty kósheler men mektep mańyna ýaqytsha asfált tóseýdi tapsyrdy. Tolyq asfálttaý kelesi jylǵa josparlanǵan. Sondaı-aq tar kóshelerde birjaqty qozǵalys engizý, 5 avtobýs aıaldamasyn ornatý jáne jol qurylysy aıaqtalǵannan keıin jańa qoǵamdyq kólik baǵyttaryn iske qosý jóninde tapsyrmalar berildi.
Alǵabas shaǵynaýdanynda ınjenerlik jeliler qurylysy 2024 jyly aıaqtaldy. Bıyl qala mobıldiligi basqarmasy jol salý jobasyn júzege asyrýda. Búgingi tańda 31,9 shaqyrym asfáltbeton jabyny tóseldi. Qyrkúıek aıynyń sońyna deıin 1 368 jol belgisin ornatý josparlanǵan.
Sonymen qatar, shaǵynaýdandy elektr qýatymen qamtý jumystary júrgizilýde. Jańa elektr jelileri men jaryq baǵanalary ornatylyp jatyr. Onyń ishinde kóshe jaryǵyn tolyq iske qosý jumystary da bar. Barlyq jumystardy osy jyldyń qyrkúıek aıynyń sońyna deıin aıaqtaý kózdelgen.