Almatyda jaramsyz jaǵdaıǵa kelgen saıabaqtar men skverlerdi qaıta jańartý jumystary júrgizilýde.
Negizgi maqsat – qala turǵyndarynyń ýaqyt ótkizýine qolaıly jaǵdaı jasaý. Aıta ketsek, áleýmettik jelilerde búkil granıt plıtalaryn jańartý týraly aqparat shyndyqqa janaspaıdy, dep habarlaıdy Almaty-akshamy.kz.
Máselen, Ýálıhanov atyndaǵy saıabaq pen Qonaev kóshesi jaǵynan vıdeokadrlarǵa túsken gúlzarlar men granıtti plıtalardyń shamamen 80-85%-y saqtalady, tek synǵan jáne qaıta qalpyna kelmeıtin granıt plıtkalar ǵana aýystyrylady.
Medeý aýdany ákimdiginiń aqparatyna sáıkes, aǵymdaǵy jyly QR Prezıdenti janyndaǵy Ulttyq Ǵylym Ordasynyń ǵımaraty - sáýlet eskertkishin kúrdeli jóndeý jáne qalpyna keltirý jumystary bastaldy. Osy joba aıasynda irgeles aýmaqtardy abattandyrý jumystary da josparlanǵan. Shoqan Ýálıhanov atyndaǵy saıabaqta granıtti plıtkany qalpyna keltirý men jóndeý jumystary bastaldy. olar tazalaý úshin alynyp, keıin qaıta óz oryndaryna qoıylady. Tirek qabyrǵalarynyń granıt plıtalary, sondaı-aq gúlzarlar men trotýarlardy jıekteıtin shekaralar bólshektelmeıtinin eskerý mańyzdy. Sonymen qatar, jóndeý jumystary barysynda sýburqaqtar júıesi tazalanady. Jumystardy aǵymdaǵy jyldyń qyrkúıek aıynda aıaqtaý josparlanýda.
Osyndaı jumystardy Qonaev kóshesi jaǵynan Ǵylym Ordasynyń ǵımaratyna irgeles jatqan skverde júrgizý kózdelgen. Mundaǵy granıtti plıtalar da qalpyna keltirilip, tazalap, tegistegennen keıin ornyna qaıtarylady. Sonymen qatar, alańda jaryqtandyrý tirekteri ornatylyp, butalar men gúlzarlar otyrǵyzylady. Aıaqtalý merzimi-osy jyldyń qazan aıynda.
Aıta keterligi, eki nysan boıynsha jumystar jeke qarajat esebinen júzege asyrylady.
Sonymen qatar, «Halyq qatysatyn búdjet» baǵdarlamasy aıasynda Pýshkın kóshesiniń boıyndaǵy skverde jóndeý jumystary bastaldy. Munda jaryqtandyrý tirekteri qalpyna keltirilip, A.S. Pýshkın eskertkishiniń aldyndaǵy tósenishter aýystyrylady, jasyl ekpelerdiń avtomatty sýarý júıesi ornatylady, butalar men gúlzarlar otyrǵyzylady.
«Zodıak belgileri» sýburqaǵynyń aınalasyndaǵy granıt plıtkalar jaqsy, sondyqtan alynbaıdy. Jumystar aǵymdaǵy jyldyń qazan aıynda aıaqtalady.
Buǵan deıin D.Qonaev atyndaǵy skverde syrtqy jaryqtandyrýdy qalpyna keltirý jumystary týraly habarlanǵan bolatyn. Búgingi tańda 26 tirek pen 56 shamdy qalpyna keltirý jumystary aıaqtaldy.