Ǵalym Gúlnur Tatyhanova ashqan jańalyqtyń paıdasy – oftalmologıa salasynda qoldanylatyn kóz tamshysynyń negizinde jasalǵanynda.
Sátbaev Ýnıversıtetiniń ınjenerlik beıimdeý zerthanasy jetekshisiniń orynbasary Gúlnur Tatyhanova Fınlándıa memleketindegi Helsınkı ýnıversıtetinde ǵylymı zertteý jumysyn júrgizýde, dep habarlaıdy Almaty-akshamy.kz.
Bul týraly Q.Sátbaev atyndyǵy Qazaq ulttyq tehnıkalyq zertteý ýnıversıtetiniń baspasóz qyzmeti habarlady.
Onyń ǵylymı jańalyǵynyń ereksheligi – tamshy kóz qabatymen janasqanda óte juqa jáne móldir plenka túzip, dárilik zatty birtindep uzaq ýaqyt syrtqa úzdiksiz dozalyq mólsherde bólip otyrady.
Ǵalymnyń atalǵan ýnıversıtettiń Hımıa departamentiniń polımerler jáne koloıdtar bólimindegi zertteý jumysynyń maqsaty - «Oftalmologıa úshin áser etý merzimi uzartylǵan kóz tamshylaryn polısaharıd – gellan men ofloksasın negizinde alý» atty jobanyń zertteý jumystaryn jetildirý. Sonymen qatar «Jumsaq bıoúılesimdi polımerli nanoqurylym: oftalmologıanyń keleshegi úshin nanofarmasevtıka preparattaryn alý» taqyryby negizinde zerthanalyq zertteý jumysyn júrgizý.