İİM M.Esbolatov atyndaǵy Almaty akademıasynda qazaq detektıviniń atasy Kemel Toqaevqa arnalǵan burysh ashyldy.
65 jyldyq tarıhy bar Almaty akademıasynda jazýshy Kemel Toqaevqa arnalǵan burysh ashýdyń da ózindik sebebi mol. Atalǵan oqý orny qurylǵan alǵashqy jyldardyń ózinde-aq kýrsanttardyń patrıottyq tárbıesi men rýhanı damýyna erekshe kóńil bólindi, dep habarlaıdy Almaty-akshamy.kz Polisia.kz-ke silteme jasap.
Bul oraıda kýrsanttar úshin Keńes Odaǵynyń Batyry B.Momyshulymen, partızan otrádynyń komandıri Q. Qaısenovpen, Keńes Odaǵynyń eki márte Batyry T.Bıgeldınovpen, S.Lýganskıımen jáne ataqty ánshi Roza Baǵlanovamen, jazýshy Muhtar Áýezovpen kezdesýlerdiń mańyzy erekshe boldy. Solardyń ishinde Qazaqstanda detektıv janryn damytqan jazýshy Kemel Toqaevtyń kýrsanttarmen kezdesýi olardyń esinde máńgi saqtalatyn jıyn bolǵan edi. Óıtkeni jazýshynyń “Juldyzdy joryq”, “Aǵyn”, “Arnaýly tapsyrma”, “Túnde atylǵan oq”, “Sarǵabanda bolǵan oqıǵa”, “Taýdaǵy jańǵyryq”, “Sońǵy soqqy”, “Soldat soǵysqa ketti”, “Qastańdyq”, “Uıasynan bezgen qus”, “Kómeski iz” kitaptary men qazaqstandyq chekıserge arnalǵan “Tańbaly altyn” povesi kýrsanttardyń qolynan túspeıtin shyǵarmalar edi.
Mılısıa men memlekettik qaýipsizdik organdary qyzmetkerleriniń ómirinen alynǵan oqıǵalardyń jelisi qylmysker qalaı jasyrynsa da, qaıda qashsa da, ádil jazadan qutylyp kete almaıtyndyǵymen qundy boldy.
Qazaqstannyń Halyq jazýshysy Ázilhan Nurshaıyqov kezinde: – Qazaq ádebıetindegi detektıv janrynyń kóshbasshysy Kemel Toqaev qazaq jazýshylarynyń ishindegi oqyrmany eń kóp qalamgerlerdiń biri boldy. Oqyrmandarynyń ótinishi boıynsha Kemeldiń kitaptary úsh-tórt retten qaıta basylyp otyrdy, – degen bolatyn.
Al Memlekettik syılyqtyń laýreaty Ákim Tarazı: – Kemel aǵa Toqaevpen biz únsiz tabystyq. “Sarǵabanda bolǵan oqıǵa” hıkaıasyn oqydym. Unattym. Unatyp qana qoıǵan joqpyn, tańǵaldym. Kemel aǵa kıeli qazaq ádebıetiniń jańa arnasyn ashty. Shytyrman oqıǵaly shymyr shyǵarmalar jazdy. Kemel aǵanyń týyndylary oqyrman júregi dep atalatyn altyn mejeden bir-aq tabylatyn. Kitaptary dúken sóresinde bir kún de jatpaıtyn, – degen eken.
Almaty akademıasynda ashylǵan buryshqa jazýshynyń atalǵan oqý ornyna kelgendegi sýretteri men kitaptary, belgili tulǵalardyń Kemel Toqaev týraly estelikteri qoıyldy. K.Toqaevtyń shyǵarmalaryn nasıhattaý munymen shektelip qalmaq emes. Aldaǵy ýaqytta Almaty akademıasynda qazaq detektıv janry atasynyń shyǵarmashylyǵyn zertteý maqsatynda ǵylymı konferensıa jáne konkýrstar uıymdastyrylady.