M.Esbolatov atyndaǵy Almaty akademıasynda ishki ister organdarynyń basshy quramyn daıarlaý fakúltetiniń tyńdaýshylaryna sertıfıkat tapsyryldy.
Sertıfıkat tapsyrý saltanatyn Almaty akademıasynyń basshysy A.Saıtbekov ashyp, sertıfıkat ıelerine sát-sapar tiledi,.
«Sizder bizdiń akademıa qabyrǵasynan úlken jaýapkershilik arqalap bara jatsyzdar. Memleket basshysynyń qoldaýymen júzege asyrylyp jatqan Jańa Qazaqstandy qurýdyń basty talaby – zamanaýı tehnologıalardy qoldana otyryp, elimizdiń ár salasyn biliktilikpen basqarý. Osy talap úddesinen shyǵý úshin sizder akademıanyń kásibı mamandarynan jan-jaqty bilim aldyńyzdar. Kásibı daıyndyqpen qatar, moraldyq-etıkalyq, kommýnıkatıvtik jáne psıhologıalyq daıyndyqtan ótip, sheshendik ónerdi, basqarý, ákimshilik-sharýashylyq qyzmet salasyndaǵy daǵdylardy, qarjylyq jáne quqyqtyq saýattylyqty, jobalyq, daǵdarystyq jáne HR-menedjmentti meńgerdińizder. Sizderdi jańa formasıa basshylaryn daıarlaý aıasynda alǵan bilimderińizben ishki ister organdaryndaǵy júıeli reformalardy júzege asyrýǵa eleýli úles qosady dep senemin», – dedi akademıa bastyǵy.
Atalǵan fakúltet İshki ister mınıstrliginiń 2020 jylǵy 20 jeltoqsandaǵy buıryǵymen qurylǵan bolatyn. Bıyl M.Esbolatov atyndaǵy Almaty akademıasynyń ishki ister organdarynyń basshy quramyn daıarlaý fakúlteti (№1 fakúltet) úshinshi jyl óz túlekterine sertıfıkat tapsyrdy. Saltanatty jıyn aldynda tyńdaýshylar akademıa bastyǵynyń basshylyǵymen Medeý taý shatqalyndaǵy baspaldaqty baǵyndyryp, ózderiniń sporttyq daıyndyqtaryn shyńdap qaıtty.