Almaly aýdanynyń ákimi Aıdar Jaqybaev Almatynyń Óńirlik komýnıkasıalar qyzmetiniń alańynda áleýmettik ınfraqurylymnyń qalaı ózgeretini týraly aıtty. Jalpy aýdanda balalardy orta bilimmen qamtý jaǵdaıy qolaıly, dep habarlaıdy Almaty-akshamy.kz.
Qala boıynsha aýdan oqýshy oryndarynyń tapshylyǵynan eń tómengi kórsetkishke ıe. Jalpy kontıngenti 38 myń oqýshy qurasa, 1137 oqý orny jetispeıdi. Sondaı-aq artyq mektepter bar.
Jańa turǵyn úıdiń iske qosylýyn jáne halyqtyń ósýin eskere otyryp, tapshylyqty odan ári azaıtý úshin mektepter men qosymsha ǵımarattar salý boıynsha josparly jumys iske asyrylýda.
«Jaıly mektep» ulttyq jobasy aıasynda Memleket basshysynyń tapsyrmasy boıynsha Almaly aýdanynda Raıymbek dańǵyly men Áýezov kóshesiniń qıylysynda 1,5 myń oryndyq jańa mektep salynyp, 2024 jyldyń 4 toqsanynda qurylys-montaj jumystaryn aıaqtaıdy», - dep habarlady A.Jaqybaev.
Ákimdik 300 oryndyq №16 mektepke qosymsha qurylys salýǵa jáne aǵymdaǵy jyldyń 4-toqsanynda saraptamasy ótetin №58 mektepke sport jáne akt zaldaryn salýǵa jobalaý-smetalyq qujattama ázirleıdi. Qurylys-montajdaý jumystarynyń boljamdy bastalý kúni 2024 jyldyń sáýiri (konkýrstyq rásimderdi eskere otyryp).
2024 jyldyń 1 toqsanynda Jarokov kóshesindegi №134 jáne №135 mektep ǵımarattaryn kúrdeli jóndeýmen seısmıkalyq kúsheıtý boıynsha memlekettik saraptama aktisi daıyndalady dep kútilýde. Qurylys-montaj jumystarynyń boljamdy bastalý kúni – 2024 jyldyń mamyry.
Bıylǵy jyly №15 gımnazıaǵa kúrdeli jóndeý jumystary aıaqtalsa, qarasha aıynda №136 mektep-gımnazıasyna kúrdeli jóndeý jumystarymen seısmıkalyq kúsheıtý boıynsha qurylys-montaj jumystary bastaldy. Jumys 2024 jyldyń tamyz aıynda aıaqtalady.
Aıdar Jaqybaev densaýlyq saqtaý ınfraqurylymyn damytý jaıyna keńirek toqtaldy. Almaly aýdanynda emhanaǵa barlyǵy 400 myńnan astam adam tirkelgen, 6 memlekettik, 12 jeke (memlekettik tapsyrys boıynsha jumys isteıdi) emhana jumys isteıdi.
«Kóptegen qala turǵyndaryn Abaı-Masanshy boıyndaǵy burynǵy temirjol aýrýhanasy ǵımaratynyń taǵdyry áldeneshe ret alańdatqan. Ǵımarattyń tarıhı kelbetin saqtaý maqsatynda Almaty qalasynyń ákimi zamanaýı úlgidegi «Qalalyq balalardy ońaltý ortalyǵyn» ashý týraly sheshim qabyldady», - dedi aýdan ákimi.
Búgingi kúni biz qalalyq qurylymdarmen birlese otyryp, tekserý júrgizip, ǵımarattyń qaýipsizdigin jáne qorshaýyn qamtamasyz ettik. Rekonstrksıalaýǵa qajetti jobalyq-smetalyq qujattama ázirlenip jatyr.
Taǵy bir nysan boıynsha, Áıteke bı kóshesinde (eski ǵımaratty buza otyryp, qalalyq revmatologıalyq ortalyqtyń ornyna) 500 kelýshige arnalǵan jańa emhana salý boıynsha saraptama ázirlenip jatyr.
Búgingi kúni №3 emhana ǵımaraty men qalalyq Adam reprodýksıasy ortalyǵyn kúrdeli jóndeýge jobalyq-smetalyq qujattama ázirlenýde. Jobalaý-smetalyq qujattamany ázirleýdi aıaqtaý aǵymdaǵy jyldyń 4 toqsanynyń basyna josparlanǵan.
2024 jyly №1 Perzenthananyń tozǵan korpýsyn buzý (1937 jyly salynǵan) jáne zamanaýı jabdyqtarmen jabdyqtalǵan jańa korpýs salý josparlanýda. Jobalaý-smetalyq qujattamany ázirleýdi aıaqtaý-2024 jylǵy 3 toqsan.
Sonymen qatar, 2024 jyldyń 2-toqsanynda Raıymbek dańǵyly, 312 mekenjaıy boıynsha psıhıkalyq damýy tejelgen balalarǵa arnalǵan baseıni bar sport ortalyǵynyń qurylysy bastalady.