Almaly aýdanynyń ákimi Aıdar Jaqybaev Almaty ÓKQ brıfıńinde kóshe jaryǵyn jańǵyrtý týraly aıtyp berdi. Aýdannyń kóshe jaryǵyna búdjetten 837,8 mln teńge bólindi.
Tamyz aıynan bastap barlyǵy 2391 sham jáne 18 km kabeldik jeli aýystyryldy. Aýdan ákimi óz sózinde turǵyndardyń eń kóp ótinishteri kóshelerdi jaryqtandyrý máselesine qatysty ekenin atap ótti.
«Eger aptasyna 60-70 ótinish kelip tússe, olardyń shamamen 40% - y kósheni jaryqtandyrýǵa qatysty. Aǵymdaǵy jyly aýdannyń kóshe jaryǵyna búdjetten 837,8 mln. teńge bólindi. Almaly aýdany ákiminiń apparatymen «Almaty Qala Jaryq» MKK - men shart jasaldy», - dedi A.Jaqybaev.
Sonymen qatar, jedel áreket etý úshin jelige kún saıyn 7 arnaıy tehnıka shyǵady, ótken jyly bir ǵana birlik bolǵan. 2023 jylǵy tamyzdan bastap turǵyndardan 308 ótinim kelip tústi, onyń ishinde 236 (76%) pysyqtaldy, bul rette ótinimderdi qaraý ýaqyty 5 táýlikke deıin tómendedi.
Sondaı-aq, Qazybek bı, Áıteke bı, Jambyl, Abaı kóshelerindegi LED-shamdardy aýystyrý jumystary aıaqtalýda. Jeltoqsan aıynyń sońyna deıin Qarasaı batyr, Qurmanǵazy, Abylaı han kóshelerin aýystyrýdy aıaqtaý josparlanýda.