Almaty qalasynyń Almaly aýdanynda turǵyndardyń ótinishimen júzege asyrylǵan jobalarǵa arnalǵan baspasóz týry ótti, dep habarlaıdy aqshamnews.kz
Panfılov kóshesi jańǵyrtyldy
Alǵashqy nysan – qalanyń negizgi jaıaý júrginshiler kósheleriniń biri Panfılov kóshesi boldy. Kún saıyn bul kósheden 10-15 myń adam ótedi, demalys jáne mereke kúnderi bul kórsetkish birneshe esege artady. Aýdan ákimi Arman Shamshınniń aıtýynsha, kósheniń joǵary júktemesi jáne taýar jetkizetin avtokólikterdiń kóptigi jol tósemine jáne dekoratıvti elementterge úlken salmaq túsiredi. Osyǵan baılanysty turǵyndar kósheni jańartýdy suraǵan.
2017 jyldan beri alǵash ret kósheni jóndeý týraly sheshim qabyldanyp, qyrkúıek aıynda bastalǵan jumystar aıasynda:
- 2 myń sharshy metr kespe tas jańartyldy,
- 130 jańa oryndyq jáne 2 balalar alańy ornatyldy,
- sýburqaq jóndeldi,
- jasyl aımaq 20%-ǵa keńeıtilip, jańa butalar otyrǵyzyldy.
Sondaı-aq qolónershilerge arnalǵan modýldi úıler, stasıonarlyq polısıa beketi jáne zamanaýı «Sapar ortalyǵy» ornatyldy. Turǵyndar jańartylǵan kósheniń qolaılylyǵyn joǵary baǵalady.
№136 mekteptegi kúrdeli jóndeý
Kelesi nysan – №136 jalpy bilim beretin mektep. Munda 35 jyldan beri alǵash ret seısmıkalyq nyǵaıtý arqyly kúrdeli jóndeý jumystary júrgizildi:
- robototehnıka, hımıa, bıologıa, fızıka, ınformatıka kabınetteri jańartyldy,
- uldar men qyzdarǵa arnalǵan tehnologıa kabınetteri men sheberhanalar jabdyqtaldy,
- barlyq pán kabınetteri ınteraktıvti panelder jáne jańa jıhazdarmen qamtamasyz etildi.
«Shyǵys AZTM» skveri
Baspasóz týry barysynda jýrnalıser «Halyq qatysatyn búdjet» baǵdarlamasy aıasynda jańǵyrtylǵan «Shyǵys AZTM» skverin de aralady. Jańa «Nomad» turǵyn úı kesheniniń turǵyndary bul bastamany kótergen.
Skver aýmaǵynda:
- trenajerler, jaıaý júrginshiler joldary,
- 10 myń sharshy metr kógal, gúlder men aǵashtar otyrǵyzyldy,
- jańa jaryqtandyrý júıesi ornatyldy.
Qala turǵyny ári «HQB» jobasynyń teń avtory Alena Shın bul skverdiń aýdan maqtanyshy ekenin atap ótti:
"Bul tek skver ǵana emes, jasandy toǵany bar biregeı oryn. Balalarym osy jerde oınaıdy, voleıbol alańy da keremet. Otbasylyq demalys úshin barlyq jaǵdaı jasalǵan."
Jańa qoǵamdyq keńistik
Sońǵy nysan – Rozybakıev kóshesiniń boıynda, Dúısenov kóshesinen ońtústikke qaraı ornalasqan jańa skver. Buryn bul aýmaqta beıbereket saýda oryndary bolǵan, turǵyndar birneshe ret jasyl aımaq qurýdy suraǵan.
Nátıjesinde:
- shamamen 2 myń sharshy metr kógaldy aımaq,
- gúlder men aǵashtar otyrǵyzyldy,
- oryndyqtar, trenajerler, pergolalar, balalar alańdary men júgirý joldary ornatyldy,
- avtomatty sýarý jáne jaryqtandyrý júıesi iske qosyldy.
Turǵyn Ásem Nurǵazına bul ózgeristerge rızashylyǵyn bildirdi:
"Buryn munda beıbereket bazar boldy, qazir ádemi, jasyl demalys ornyna aınaldy. Eresekter de, balalar da jaıly ýaqyt ótkize alady."
2023 jyly Almaly aýdanynda «Halyq qatysatyn búdjet» baǵdarlamasy aıasynda 34 joba júzege asyrylsa, 2024 jyly 52 joba josparlanǵan.
"Jasyl demalys aımaqtary qalanyń ekologıalyq jaǵdaıyn jaqsartýda mańyzdy ról atqarady. Biz árqashan turǵyndardyń bastamalaryn qoldaımyz," – deıdi aýdan ákimi Arman Shamshın.