2025 jyly 12 mamyrdan bastap «Alma-Arasan» avtoturaǵynan radon bulaǵyna deıingi marshrýtty keshendi jańǵyrtý bastaldy. Joba aıasynda radon bulaǵynyń ınfraqurylymyn jańartý, betkeılerdi nyǵaıtý, kópirlerdi qaıta jóndeý, sonymen qatar jol boıyn kóriktendirý – jańa tósenishter, baspaldaqtar men demalys oryndaryn ornatý jumystary qamtylǵan. Bul týraly Almaty qalasynyń týrızm basqarmasy habarlady.
Bulaq mańynda taý jynystarynyń qulaýynan qorǵaný jumystary júrgizilýde, oǵan ónerkásiptik álpınıser tartylǵan. Týrıserdiń qaýipsizdigin qamtamasyz etý maqsatynda turaqsyz taý jynystarynan betkeılerdi tazartý kózdelgen, sonyń ishinde tastardy synyq temirler men gıdroquraldardy paıdalanyp, qolmen túsirý jumystary júrgiziledi.
Betkeılerdiń qosymsha turaqtylyǵyn qamtamasyz etý úshin ankerlik júıeler ornatylady. Betkeılerdiń betin bolat torlarmen jáne tartpa arqanmen qosymsha bekitý jumystary júrgizilip, bul taý jynystarynyń turaqtylyǵyn arttyryp, qulaý qaýpin azaıtady.
Jańǵyrtý jumystary 2025 jyly shilde aıynyń sońyna deıin aıaqtalady dep josparlanǵan. Degenmen keıbir jumystardyń merzimi aýa raıynyń jaǵdaıyna baılanysty ózgerýi múmkin. Barlyq jumys aıaqtalǵannan keıin bul marshrýt anaǵurlym qaýipsiz, jaıly ári ekologıalyq taza bolyp, ártúrli jastaǵy jáne daıyndyq deńgeıindegi týrıserge beıimdeledi.
«Qala turǵyndary men qonaqtarynan saparlaryn josparlaý kezinde ýaqytsha shekteýdi eskerýlerin suraımyz. Jumys barysy men ýaqytsha jabylýlar týraly aqparat qosymsha jarıalanady», – dedi habarlady qalanyń týrızm basqarmasy.