Alıment tóleýden jaltarǵan tulǵalarǵa qatysty izdeý jarıalaıdy
Balany asyraý – ata-ananyń zańmen bekitilgen mindeti. Bul mindettiń oryndalýy ata-ananyń nekede bolýy, azamattyq nekede nemese ajyrasqan bolýyna qaramastan ózgermeıdi. Qazirgi tańda elimizde jaýapkershilikti sezinbeıtin ata-analardyń balasyna alıment tólemeı júrgeni ózekti máselelerdiń biri bolyp otyr. Alımentter aı saıyn ata-anasynyń eńbekaqysynan nemese ózge tabysynan zańmen belgilengen mólsherde tólenýi tıis.
Jumys istemeıtin boryshkerdiń tóleýge mindetti alıment mólsheri Qazaqstan Respýblıkasynyń ortasha jalaqysyna sáıkes esepteledi. Quzyrly organdar tarapynan túrli sharalar qabyldanyp jatsa da, balasynyń jaǵdaıyna mán bermeıtin, alıment tóleýden jaltaryp júrgen ákelerdiń sany azaımaı otyr.
Alıment tóleýden jaltaryp júrgen boryshkerlerge qatysty jumystar úzdiksiz júrgizilýde. Bul jumystar boryshkerlerdi jumysqa ornalastyrý, bereshegi kóp boryshkerlerdi ákimshilik jaýapkershilikke tartý, olardyń atyna tirkelgen múlikke tyıym salý sekildi sharalardy qamtıdy.
Sonymen qatar, Qazaqstan Respýblıkasynyń atqarýshylyq is júrgizý zańnamasyna sáıkes alıment tóleýden jaltaryp júrgen boryshkerlerge izdeý jarıalaý – májbúrleý sharalarynyń biri bolyp tabylady. Sot oryndaýshysy alıment tóleýden jaltaryp júrgen boryshkerdi tabý úshin izdeý jarıalaý týraly qaýly shyǵarady, bul qaýly prokýrordyń sanksıasynan ótip, kóshi-qon polısıasyna joldanady.
Kóshi-qon polısıasy alıment tólemeı júrgen boryshkerdi tabý maqsatynda qajetti izdeý sharalaryn júrgizedi. Boryshker anyqtalǵan jaǵdaıda, kóshi-qon polısıasy odan atqarýshylyq is boıynsha mindettemelerin oryndaýǵa baılanysty túsinikteme alady. Sodan keıin sot oryndaýshysyna boryshkerdiń mekenjaıy týraly tolyq málimet joldanyp, qaryzdy óndirý jumystary jalǵasady.
Boryshkerler alıment tóleý – zańdy mindet ekenin jáne ony oryndamaǵan jaǵdaıda ákimshilik jáne qylmystyq jaýapkershilikke tartylatynyn umytpaýy qajet.