«Teńizshevroıl» birlesken kásipornynyń qurylǵanyna 30 jyl tolady
QR Premer-Mınıstri Álıhan Smaıylov «Shevron» munaı-gaz korporasıasynyń atqarýshy vıse-prezıdenti Naıdjel Hırn jáne «Shevron. Halyqaralyq barlaý jáne óndirý» kompanıasynyń prezıdenti Kleı Neffpen kezdesti, dep habarlaıdy Almaty-akshamy.kz.
Qatysýshylar Teńizdi bolashaqta keńeıtý jáne ondaǵy saǵalyq qysymdy basqarý jobalaryn iske asyrý barysyn, KQK qubyr júıesiniń ótkizý qabiletin arttyrý jáne jumyspen qamtý sharalaryn, sondaı-aq Qarashyǵanaq ken ornyn ıgerýdiń ózekti máselelerin talqylady.
Kezdesý barysynda Premer-Mınıstr bıyl «Teńizshevroıl» birlesken kásipornynyń qurylǵanyna 30 jyl tolatynyn eske saldy.
«Teńiz jobasy – Qazaqstanda 1993 jyldan beri iske asyrylyp kele jatqan eń tabysty jobalardyń biri. Osy jyldary “Teńizshevroıl” elimizdiń ekonomıkasynyń damýyna zor úles qosty. Úkimet aradaǵy tıimdi yntymaqtastyqty odan ári jalǵastyrýǵa nıetti», — dedi Álıhan Smaıylov.
Óz kezeginde «Shevron» kompanıasynyń ókilderi Qazaqstanmen qoldanystaǵy jáne perspektıvaly baǵyttar boıynsha strategıalyq áriptestikti nyǵaıtý boıynsha jumys isteýge daıyn ekendikterin rastady.
«Respýblıkadaǵy alǵashqy iri ınvestorlardyń biri bolý – biz úshin zor mártebe. Sońǵy 30 jyl ishinde seriktesterimizben iskerlik yntymaqtastyq ornattyq. Biz ónimdilikti ulǵaıtý baǵytynda úzdiksiz jumys isteı otyryp, tehnıkalyq tájirıbemizdi, tehnologıalyq sheshimderimizdi jáne ınvestısıalarymyzdy elge tarttyq. Osy ýaqyt ishinde "Teńizshevroıl" jumyskerlerge jalaqy tóleý, jergilikti taýarlar men qyzmetterdi satyp alý, salyqtardy jáne t. b. qosa alǵanda, qazaqstandyq kásiporyndarǵa $176 mlrd tikeleı qarjylyq tólemderdi júzege asyrdy. Biz jergilikti kadrlardy oqytýǵa jáne olardyń kásibı ósýine yqpal ettik, olardyń áleýeti men múmkindikterin arttyrdyq. Búginde qazaqstandyqtar TSHO-daǵy 90%-dan astam laýazymǵa ıe bolyp otyr», — dedi Naıdjel Hırn.
Kezdesýge Energetıka mınıstri Almasadam Sátqalıev pen «QazMunaıGaz» UK» AQ basqarma tóraǵasy Maǵzum Myrzaǵalıev qatysty.