Sanıtarlyq talaptarǵa neǵurlym salǵyrt qaraýdyń sońy aýrýdyń soǵurlym ósýine ákep soǵatynyn adamdar túsinýi kerek. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy Almaty-akshamy.kz QazAqparatqa silteme jasap.
«Elimizdiń búkil óńirinde koronavırýs ınfeksıasymen naýqastanýdyń kúrt óskeni baıqalyp otyr. Jyl basynan beri indetti juqtyrý deńgeıi 21 esege ósti. Túrkistan oblysy ǵana «sary aımaqta», al qalǵan óńirdiń barlyǵy «qyzyl aımaqta». Táýligine vırýstyń eń kóp taralý jaǵdaıy elordada, Almaty qalasynda, Qaraǵandy jáne Atyraý oblystarynda tirkelip otyr. Biz mundaı jaǵdaıdyń bolaryn boljadyq, eń bastysy, barlyq óńirde epıdemıologıalyq ahýaldy qatań baqylaýda ustaý qajet», - dedi Úkimet basshysy.
Onyń atap ótýinshe, koronavırýstyń taralýyna jol bermeý jónindegi vedomstvoaralyq komısıa óńirlerde qosymsha shekteý is-sharalaryn qabyldady. Olar naqty oryndalýy tıis.
«Betperde kıý, áleýmettik araqashyqtyqty saqtaý sıaqty negizgi aldyn alý sharalaryn buljytpaı saqtaý kerek. Sanıtarlyq talaptarǵa neǵurlym salǵyrt qaraýdyń sońy aýrýdyń soǵyrlym ósýine ákep soǵatynyn adamdar túsinýleri kerek. Sondyqtan monıtorıńtik toptardyń jumys qarqynyn barynsha kúsheıtý qajet. Vırýstyń taralýyn azaıtý úshin naýqastardy der kezinde oqshaýlap, adamdardyń kóp jınalýyna jol berilmeýi tıis», - dedi Premer-Mınıstr.
Osyǵan oraı ol Densaýlyq saqtaý mınıstrligi men ákimdikterge aýrýhanalarda qosymsha oryndar daıyndaýdy tapsyrdy.
«PTR-testileý deńgeıi tómen óńirlerde olardyń sanyn ulǵaıtý qajet. Ásirese, Almaty, Shyǵys Qazaqstan, Jambyl, Qostanaı jáne Túrkistan oblystarynda testileý az jasalady. Elordada, Almaty, Shymkent qalalarynda, Atyraý, Túrkistan, Almaty, Qyzylorda jáne Mańǵystaý oblystarynda revaksınalaý qarqyny jaqsarǵan joq. Demek, bul máselege ákimder durys qaramaı otyr. Sondyqtan atalǵan óńirler bul jumysty tezdetý kerek», - dedi Álıhan Smaıylov.