"Omıkron" shtamymen aýyrý kóp jaǵdaıda jeńil jáne sımptomsyz ótedi. Bul týraly búgin Úkimet otyrysynda QR Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparatqa silteme jasap.
«Búgin elimizde barlyǵy 21 myń ınfeksıalyq tósek-oryn ashyldy. Onyń 33 paıyzynda naýqastar jatyr. Reanımasıalyq tósek-oryn - 2 myńnan astam, onyń 16 paıyzy bos emes. Rezervte 30 myń ınfeksıalyq jáne 3 myń reanımasıalyq oryndar bar. Óńirler boıynsha stasıonarlyq kómek uıymdastyrý máselesi turaqty baqylaýǵa alynǵan», - dedi mınıstr.
Onyń atap ótýinshe, koronavırýstyń "omıkron" shtamymen aýyrý kóp jaǵdaıda jeńil jáne sımptomsyz ótedi.
«Qysqa 2 kúndik juǵý kezeńimen sıpattalady. Aýrýdyń eselep kóbeıýi de sodan. Aýrýdyń alǵashqy belgileri - tumaý men jedel respıratorlyq aýrýlardaǵy sıaqty «sýyq tıý» kórinisi, ıaǵnı qyzý, álsizdik, bas aýrýy, jótel. Búgingi jaǵdaı boıynsha aýrýlardyń 80 paıyzy, ıaǵnı 78 629 aýrý ambýlatorıalyq em alýda. Sońǵy aptada anyqtalǵan jaǵdaılardyń ishinde aýrýhanaǵa jatqyzylǵan adamdardyń úles salmaǵy - 19,5 paıyz. Stasıonarǵa aýrýdyń orta jáne aýyr dárejesimen aýyratyn pasıentter túsip jatyr. Bul rette emdeýge jatqyzylǵan adamdardyń ishinde aýyr jáne óte aýyr pasıentterdiń úlesi – 5 paıyz», - dedi Ajar Ǵınıat.