Úkimet basshylary túrli salalardy damytýdy talqylady
Máskeýde QR Premer-Mınıstri Álıhan Smaıylov RF Úkimetiniń tóraǵasy Mıhaıl Mıshýstınmen kezdesti, dep habarlaıdy Almaty-akshamy.kz QazAqparat-qa silteme jasap.
Álıhan Smaıylov bıylǵy barlyq negizgi is-sharalar eki el arasyndaǵy dıplomatıalyq qatynastyń ornaǵanyna 30 jyl tolýyna oraı ótip jatqanyn eske saldy.
«UQSHU-ǵa múshe memleket basshylarynyń mereıtoılyq otyrysy aıasynda prezıdentterimizdiń jaqynda ótken kezdesýi barysynda strategıalyq yntymaqtastyqty údemeli damytý úshin mańyzdy baǵdarlar belgilendi», - dedi ol.
Premer-Mınıstr Qazaqstan Úkimeti Reseımen barlyq baǵyttar boıynsha ózara tıimdi yntymaqtastyqty tereńdetýge jáne nyǵaıtýǵa nıetti ekenin atap ótti.
«Bizdiń aldymyzda saýda men ınvestısıalardy odan ári nyǵaıtý mindeti tur. Reseı Federasıasy Qazaqstannyń negizgi saýda-ekonomıkalyq seriktesi. Biz ózara taýar aınalymynyń ótken jyldyń qorytyndysy boıynsha úshten birge óskenin jáne rekordtyq kórsetkish 24 mlrd dollarǵa jetkenin atap óttik. Osy jyly da oń dınamıka saqtalýda - tórt aıda taýar aınalymy ósip, 7,2 mlrd dollardy qurady», - dedi Á.Smaıylov.
«Biz dostyǵymyzdy, Qazaqstanmen odaqtastyǵymyzdy baǵalaımyz. Biz basym mindet retinde, onyń ishinde Qazaqstanmen saýda-ekonomıkalyq yntymaqtastyqty keńeıtýdi qarastyryp otyrmyz», - dedi Mıhaıl Mıshýstın.
«Óńiraralyq jáne ınvestısıalyq yntymaqtastyqty belsendi damytýdy usynamyz. Jınaqtalǵan reseılik tikeleı ınvestısıalar sońǵy 15 jylda 15 mlrd dollardy qurady. Qosymsha múmkindikterdi osy jyldyń shilde aıynda Ekaterınbýrgte ótetin Innoprom kórmesi ashady dep oılaımyn. Biz Qazaqstannyń osy jyly kórmeniń áriptes eli retinde qatysatynyna óte qýanyshtymyz», - dedi M.Mıshýstın.
Kezdesý aıasynda úkimet basshylary ekijaqty saýda-ekonomıkalyq yntymaqtastyqtyń ózekti máselelerin, sonyń ishinde energetıka, kólik ınfraqurylymy, bilim, ǵylym, mádenıet jáne basqa da salalardaǵy kooperasıany damytýdy talqylaıdy.