QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda qyzylshamen syrqattanýshylyqtyń kúrt ósýi kún tártibinen tys qaraldy.
Densaýlyq saqtaý mınıstri Ajar Ǵınıat habarlaǵandaı, qyzylsha aýrýynyń asqynýy boıynsha álemniń 167 elinde 415 myńnan astam jaǵdaı tirkelgen. Elimizde qyzylshanyń 17 myńnan astam jaǵdaıy tirkeldi. Olardyń 82%-dan astamy balalarǵa tıesili, onyń kópshiligi vaksına almaǵan balalar.
Qyzylsha aýrýlary barlyq óńirlerde tirkeldi, joǵary deńgeı Shymkent pen Almaty qalalarynda, Jambyl, Almaty, Mańǵystaý, Aqtóbe, Qyzylorda jáne Atyraý oblystarynda baıqalady, dep habarlaıdy Almaty-akshamy.kz.
Uıymdasqan ujymdarda balalardyń jınalýyna baılanysty bıylǵy qyrkúıek aıynan bastap syrqattanýshylyqtyń kúrt ósýi baıqala bastady. Nátıjesinde syrqattanýshylyq deńgeıi eki esege ósti. Qarasha aıynda qyzylshanyń 6 myńnan astam jaǵdaıy tirkeldi.
Búgingi tańda elimizde qyzylshamen aýyrǵan naýqastar úshin ınfeksıalyq aýrýhanalarda 3,5 myńnan astam tósek-oryn ornalastyrylǵan, stasıonarlyq emdeýde 2375 bala em alýda. Búgingi tańda tósek orynmen qamtý júktemesi – 59,5%-dy quraıdy, 1 myńnan astam oryn rezervte tur. Emdeýge jatqyzylǵandardyń ishinde 30 bala reanımasıa bólimshelerinde aýyr jaǵdaıda jatyr, 1 jasqa deıingi – 15 bala bar.
Qyzylsha boıynsha jaǵdaıdy turaqtandyrý maqsatynda 1 jastan 6 jasqa deıingi 600 myńnan astam bala josparly ımmýndaýmen qamtyldy, bul vaksınalanatyndardyń 84%-yn quraıdy. Bul DDU usynymyna sáıkes keledi. Jyl sońyna deıin osy jas aralyǵyndaǵy 100 myńnan astam balany qamtý josparlanyp otyr.
Aýrý oshaqtarynda 15,4 myńnan astam adam shuǵyl vaksınalaýmen qamtyldy. Sondaı-aq 18 jasqa deıingi buryn egilmegen 63,2 myń balalarǵa vaksınasıa júrgizildi. Sonymen qatar naýqastardyń 65%-y 5 jasqa deıingi balalarǵa tıesili ekenin eskere otyryp, qarasha aıynan bastap 1 jasqa deıingi balalardy, sondaı-aq 2 jastan 4 jasqa deıingi balalardy qosymsha jappaı ımmýndaý bastaldy, 94 myń adam qamtyldy. Bıyl barlyǵy 770 myńnan astam bala egildi.
Sonymen qatar qyzylshaǵa qarsy vaksınanyń qosymsha 1,5 mln dozasy satyp alyndy. Búgingi tańda 500 myń doza kelip tústi, jeltoqsan aıynda 1 mln doza jetkiziledi dep kútilýde. Jalpy, qosymsha ımmýndaýdyń tıimdiligi 2005, 2015 jáne 2019 jyldardaǵy qyzylshanyń aldyńǵy órshýi kezinde dáleldendi.
Premer-Mınıstr elimizde aýrýdyń taralýyn múmkindiginshe tezirek toqtatý kerektigin atap ótti.
«Qyzylsha asqynyp ketse, balalardyń densaýlyqtaryna asa qaýip tóndiredi. Sondyqtan, onymen tek densaýlyq saqtaý júıesi ǵana emes, búkil qoǵam bolyp, kúresýimiz qajet. Bala densaýlyǵy basty nazarda bolýy tıis», — dedi Álıhan Smaıylov.
Úkimet basshysy vaksına alýdan basqa, mundaı qaýipti vırýspen basqasha kúresý múmkin emes ekenin atap ótti jáne tıisti jumysty kúsheıtýdi tapsyrdy.
«Densaýlyq saqtaý mınıstrligi men ákimdikter vaksına alýdyń qajettiligi týraly aqparattyq-túsindirý jumystaryn kúsheıtý kerek. Barlyq ákimder vaksınalaý máselesin jeke baqylaýda ustap, Densaýlyq saqtaý mınıstrligimen birge jumysty úılestirýi qajet», — dedi Premer-Mınıstr.