Úkimette Qytaımen shekaradaǵy ótkizý beketteri arqyly júk kólikteriniń ótýin jedeldetý máselesi talqylandy.
Mınıstrler kabınetiniń dereginshe, búgingi tańda «Nur Joly» baqylaý-ótkizý beketinde komersıalyq júkterdi ótkizetin tasymaldaýshylardan uzyn-sonar kezek túzilgen. Atap aıtqanda, buǵan Qytaıdyń koronavırýsqa baılanysty qoıǵan kólik shekteýlerin alyp tastaýy tikeleı áser etip, nátıjesinde aradaǵy júk tasymaly ulǵaıǵan, dep habarlaıdy Almaty-akshamy.kz Ulysmedia.kz-ke silteme jasap.
Bul kezek elektrondy túrde QR QM «Aqparattyq-esepteý ortalyǵy» AQ platformasynda Qoldau.kz saıty arqyly júrgiziledi. Sonymen qatar ákimshilik kedergilerdi qosa alǵanda, birqatar faktorǵa baılanysty ótkizý beketi tolyq kúshin paıdalanyp jatqan joq, táýligine 100-den aspaıtyn júk kóligine qyzmet kórsetiledi. Óz kezeginde bul jabdyqtar men quramdas bólshekterge muqtaj ınvestısıalyq jobalardy iske asyrýǵa keri áser etedi jáne jalpy el ekonomıkasynyń damýyn tejeıdi.
Premer-Mınıstr úsh kún merzimde jasandy kedergilerdi joıý boıynsha normatıvtik ózgerister daıyndaýdy tapsyrdy, bul shekaradaǵy orynsyz kedergilerdi jedel joıýǵa jáne osylaısha táýligine myńǵa jýyq avtokólikti ótkizýge múmkindik beredi.
«Búgin-erteń osy kedergilerdiń barlyǵyn alyp tastaý kerek. Eger osy beket arqyly myń mashınany ótkizý qajet bolsa, ony qamtamasyz etý kerek. Bıznes bizden kómek surap jatyr. Adamdardyń júkteri bekette tur, olar sharasyz kúıde», — dedi Álıhan Smaıylov.
Budan basqa ýákiletti organdarǵa osyndaı kezektiń jınaqtalyp qalýyna jaýaptylar týraly aqparat usyný jáne shekara beketteriniń ótkizý qabiletin odan ári arttyrý jónindegi sharalardy pysyqtaý tapsyryldy.