Úkimet turmystyq zorlyq-zombylyq úshin jaýapkershilikti kúsheıtý jumystaryn jalǵastyrady
QR Premer-Mınıstri Álıhan Smaıylov Senat otyrysynan keıingi BAQ ókilderine arnalǵan brıfıń barysynda otbasylyq-turmystyq qatynastar salasyndaǵy qylmystar úshin jaýapkershilikti kúsheıtý sharalary týraly aıtty, dep habarlaıdy almaty-akshamy.kz
Úkimet basshysy atap ótkendeı, 2009 jyly elimizde «Turmystyq zorlyq-zombylyq profılaktıkasy týraly» Zań qabyldandy. Qazaqstan TMD-da osyndaı zań qabyldanǵan alǵashqy el boldy. Keıingi jyldary zańnamaǵa jaýapkershilikti kúsheıtý jaǵyna qaraı birneshe ret ózgerister engizildi.
«Bıyl sońǵy ózgerister qabyldandy. Atap aıtqanda, qamaýǵa alý merzimi 5 táýlikten 15 táýlikke deıin, al zań buzýshylyq qaıtalanǵan jaǵdaıda 25 táýlikke deıin uzartyldy. Sonymen qatar qaıtadan tatýlasý múmkindigi alynyp tastaldy jáne turmystyq janjal barysynda densaýlyqqa aýyr nemese ortasha zıan keltirilse, ol adam 3 jyldan 6 jylǵa deıin bas bostandyǵynan aıyrylady», — dedi Álıhan Smaıylov.
Sonymen birge ol buryn qabyldanǵan normalar óz nátıjesin berip jatqanyn aıtty. Sońǵy 4 aıda jaýapqa tartylǵan otbasynyń shyrqyn buzýshylardyń sany ósti. Eger osy jyldyń İİ toqsanynda 7 myń adam jaýapkershilikke tartylsa, İİİ toqsanda olardyń sany 27 myń adamdy qurady.
«Zańnamadaǵy ózgeristerge sáıkes, endi jábirlenýshi taraptyń mindetti málimdemesi talap etilmeıdi. Kýágerlerdiń aıǵaqtary nemese beınekameralardan alynǵan jazbalar jetkilikti. Kóbinese jábirlenýshi tarap aryz jazbaıdy, ne ony qaıtaryp alady. Endi bul jaǵdaı túbegeıli ózgerdi. Biz quqyq qorǵaý organdarynyń statısıkasynan oń dınamıka kórip otyrmyz», — dedi Premer-Mınıstr.
Álıhan Smaıylovtyń aıtýynsha, atalǵan baǵyttaǵy jumystar jalǵasýda. Qazan aıynyń ortasynda Úkimetke áıelderdiń quqyqtary men balalardyń qaýipsizdigin qamtamasyz etý týraly zań jobasy usynyldy. turmystyq zorlyq-zombylyq úshin jaýapkershilikti kúsheıtýge baǵyttalǵan túzetýlerdiń sany 90-nan asyp túsedi. Olardyń basym bóligi qoldaý taýyp, jaqyn arada zań jobasy QR Parlamenti Májilisiniń qaraýyna engizilmek.
«Óz basym áıelderge qatysty zorlyq-zombylyqtyń kez kelgen túrine qarsymyn. Men de qyz tárbıelep otyrmyn, olardyń elimizde ózderin qaýipsiz sezingenin qalaımyn», — dedi Premer-Mınıstr.