Atlas toǵyz basym baǵyt boıynsha júzege asyrylady.
Qazaqstan Premer-Mınıstri Álıhan Smaıylovtyń tóraǵalyǵymen bilim berý júıesin qaıta formattaý jáne ekonomıkanyń qajettilikterine saı kadrlar daıarlaýdy qamtamasyz etý máseleleri jóninde keńes ótti, dep habarlaıdy Almaty-akshamy.kz Primeminister.kz silteme jasap.
Memleket basshysynyń tapsyrmasyn oryndaý maqsatynda «Qazaqstan Respýblıkasyndaǵy jańa kásipter men quzyretter atlasy» ázirlenip, ol 2020 jyly bekitildi.
Qujat 2025 jylǵa deıingi halyqtyń tabysyn arttyrý baǵdarlamasyna engizilgen jáne eńbek naryǵy men kásibı standarttardy boljaýǵa negiz bolyp tabylady.
Atlas munaı jáne gaz, energetıka, aýyl sharýashylyǵy, aqparattyq tehnologıalar, týrızm, kólik jáne logıstıka, mashına jasaý, taý-ken metalýrgıasy jáne qurylys salalarynan turatyn 9 basym baǵyt boıynsha júzege asyrylady.
Qazaqstanda joıylyp bara jatqan 129 mamandyq tirkelgen, 95 mamandyq transformasıa prosesinde, 239 jańa mamandyq paıda boldy (onyń 37-si munaı jáne gaz salasynda, 32-si energetıkada, 11-i mashına jasaýda, 40-y AT salasynda jáne t. b.). QR bilim jáne ǵylym mınıstri Asqat Aımaǵambetov kadrlardy daıarlaýdy qamtamasyz etý júıesine memlekettik organdar men jumys berýshiler qaýymdastyqtarynyń ókilderi qatysyp jatqanyn atap ótti.
Qazirgi eńbek naryǵy bilim berý mekemeleriniń, qyzmetkerler men jumys berýshilerdiń jańa salalarǵa, kásipter men daǵdylarǵa jedel beıimdelýin talap etedi. 2022 jyly QR joǵary oqý oryndary 91 ınovasıalyq baǵdarlama ázirledi, 2025 jylǵa qaraı ony 200-ge deıin jetkizý josparlanyp otyr.
Sonymen qatar tehnıkalyq daıarlaý baǵyttaryna memlekettik tapsyrystyń úlesi 60%-ǵa deıin ulǵaıtyldy. Sondaı-aq bıyl Qazaqstannyń 406 ónerkásiptik kásiporny 406 TKBB kolejin qamqorlyqqa alǵan. 2021 jyly bar bolǵany 51 oqý orny qamqorlyqqa alyndy. Qoldaý kórsetetin kásiporyndar qamqorshylyq jáne ındýstrıalyq keńesterdiń quramyna kiredi, pedagogterdiń taǵylymdamadan ótýine kómektesedi, oqýshylardyń óndiristik praktıkadan ótýine jaǵdaı jasaıdy jáne túlekterdi jumysqa ornalastyrý boıynsha ózderine belgili bir mindet alady. Bıyl Qazaqstanda kásiporyndardyń ótinimderi boıynsha 10 myń maqsatty memlekettik tapsyrys bólindi.
Kolejderde tehnıkalyq daıarlaý baǵyttaryna memlekettik tapsyrys úlesi 40%-dan 70%-ǵa deıin ulǵaıtyldy.
Buǵan qosa, kolejder jumys berýshilermen jáne qamqorlyqqa alýshy kásiporyndarmen kelisilgen bilim berý baǵdarlamalaryn ázirleı bastady. «Kásipter atlasynyń» ázirlenýine jáne naryqtyń tehnıkalyq mamandarǵa qajettiliginiń arttyrýyna qaramastan, Qazaqstanda kadrlarǵa qajettilikti boljaý áli de jetkilikti damymaǵany, qazirgi bilim berý baǵdarlamalary eńbek naryǵy talaptarynyń ózgerýin jáne qajettilik boıynsha boljamdardy tolyq kólemde kórsete almaıtyny atap ótildi. «Kásipter atlasyn» aýqymdy túrde engizý úshin oqý oryndarynyń bilim berý baǵdarlamalaryna túzetý engizip, bilim berý mekemelerinde jergilikti atqarýshy organdardyń memlekettik tapsyrysyn ornalastyrýdy túzetý usynyldy.
Otyrysqa qatysýshylardyń baıandamalaryn tyńdaǵannan keıin Álıhan Smaıylov hattamaǵa birqatar naqty tapsyrma engizýdi, sondaı-aq QR Úkimeti otyrysynda bilim berý júıesin qazirgi jaǵdaıǵa beıimdep qaıta qalyptastyrý máselelerin qaraýdy tapsyrdy.
