“Taza” sýtegine jáne basqa da turaqty otynǵa kóshý qyzyǵýshylyq týdyryp otyr
QR Premer-Mınıstri Álıhan Smaıylov pen Kanada Premer-Mınıstriniń EO jáne Eýropa boıynsha arnaıy ýákili, Kanadanyń Fransıadaǵy Elshisi Stefan Dıon Qazaqstan-Kanada yntymaqtastyǵyn odan ári nyǵaıtý máselelerin talqylady, dep habarlaıdy Almaty-akshamy.kz.
Taraptar ekijaqty saýdany damytý, ınvestısıalyq ózara is-qımyl jáne energetıka salasyndaǵy yntymaqtastyq máselelerin, sondaı-aq Qazaqstan-Kanada İskerlik keńesiniń qyzmetin talqylady.
Álıhan Smaıylov eki el arasynda keshendi saýda-ekonomıkalyq áriptestik qarqyndy damyp kele jatqanyn atap ótti. Máselen, ótken jyly ózara saýda kólemi 34%-dan astam ósip, shamamen $500 mln-dy qurady, al bıylǵy 9 aıda bul kórsetkish $730 mln-ǵa jetti. Sonymen qatar Qazaqstan ekonomıkasyna tikeleı kanadalyq ınvestısıalar kólemi de arta túsýde, bul kórsetkish ótken jyly $385 mln-nan asty.
«Biz ınvestısıalyq yntymaqtastyqty odan ári nyǵaıtý jáne ózara saýda kólemin ulǵaıtý baǵytynda áleýettiń zor ekenin kórip otyrmyz. Qazaqstan ekonomıkanyń túrli sektorlaryndaǵy óz ónimderiniń 45 túrin jetkizý kólemin $255 mln-ǵa ulǵaıtýǵa daıyn», — dedi Álıhan Smaıylov.
Sonymen qatar, Úkimet basshysynyń aıtýynsha, júk tranzıti jáne jańartylatyn energıa kózderin damytý salalarynda ózara tıimdi qarym-qatynastardy damytýdyń múmkindikteri zor.
Óz kezeginde Stefan Dıon qazaqstandyq tarapty Prezıdent saılaýynyń sátti ótýimen quttyqtap, respýblıkada júrgizilip jatqan áleýmettik-ekonomıkalyq reformalarǵa qoldaý bildirdi.
Stefan Dıon, naqtyraq aıtqanda, energetıka sektoryndaǵy yntymaqtastyqty nyǵaıtý perspektıvalaryna, onyń ishinde JEK jáne dekarbonızasıalaýdy damytý jónindegi iskerlik baılanystardyń keleshektegi jaı-kúıine toqtaldy.
«Bul – Qazaqstan úshin de, álemdik qoǵamdastyq úshin de óte mańyzdy qadam. Osy baǵytta birlesip jumys isteýimiz kerek. Atap aıtqanda, “taza” sýtegine jáne basqa da turaqty otynǵa kóshý qyzyǵýshylyq týdyryp otyr», — dedi Stefan Dıon.
Taraptar sondaı-aq, ekijaqty ózara is-qımyldyń ózekti máseleleri boıynsha pikir alysty.