QR Premer-Mınıstri Álıhan Smaıylovtyń tóraǵalyǵymen ótken Investısıalyq shtab otyrysynda ınvestısıalar tartý boıynsha 2021 jyly nysanaly ındıkatorlardyń oryndalý qorytyndysy jáne 2022 jylǵa arnalǵan josparlar qaraldy.
2021 jyly negizgi kapıtalǵa salynǵan ınvestısıalar kólemi 13,2 trln teńgeni qurady, bul 2020 jylǵy kórsetkishten 7,3%-ǵa artyq. Investısıalar ósiminiń negizgi lokomotıvteri ekonomıkanyń shıkizattyq emes sektorlary boldy. Máselen, ınvestısıalardyń naqty kólem ındeksteri óńdeý ónerkásibinde 1,4 ese, qurylysta 1,2 ese, aýyl sharýashylyǵynda 1,3 ese ósti, dep habarlaıdy Almaty-akshamy.kz Primeminister.kz saıtyna silteme jasap.
Óńdeý ónerkásibinde ósiminiń neǵurlym joǵary kórsetkishterine metalýrgıada (+27%), toqyma óndirisinde (+28%), farmasevtıkada (+39%), hımıa ónerkásibinde (+55%), mıneraldyq ónimderde (+100%) qol jetkizildi. Respýblıka boıynsha negizgi kapıtalǵa ınvestısıalar tartý boıynsha jyldyq jospar 94%-ǵa oryndaldy. Nysanaly kórsetkishter Shymkent qalasynda (115,5%), Aqtóbe (101,8%) jáne Qostanaı (101,3%) oblystarynda asyra oryndaldy. Qaraǵandy oblysynda (99,9%), Almaty qalasynda (99,8%), Atyraý (99,1%), Jambyl (97,4%), Pavlodar (96,2%) oblystarynda, Nur-Sultan qalasynda (96,1%) sál artta qalýshylyq bar. Shyǵys Qazaqstan (92,1%) jáne Mańǵystaý (90,8%), Almaty (89,7%), Aqmola (89,4%), Túrkistan (82,5%), Soltústik Qazaqstan (80,4%) oblystarynda jospar oryndalmaǵan. Eń tómengi kórsetkishter Batys Qazaqstan (69,6%) jáne Qyzylorda (66,4%) oblystarynda tirkeldi.
Premer-Mınıstrdiń tapsyrmasy boıynsha atalǵan eki óńir ákimderiniń orynbasarlary tártiptik jaýapkershilikke tartylatyn bolady. 2021 jyldyń 9 aıynyń qorytyndysy boıynsha QR ekonomıkasyna tikeleı sheteldik ınvestısıalar kólemi 49%-ǵa artyp, $18,7 mlrd qurady. Qazaqstan ekonomıkasyna is júzinde barlyq negizgi ınvestor elder boıynsha kapıtal aǵynynyń ósýi baıqalady. Top-10 ınvestor memlekettiń qataryna Nıderlandy, AQSH, Shveısarıa, QHR, Reseı, Ulybrıtanıa, Belgıa, Túrkıa, Ońtústik Koreıa jáne Fransıa kirdi.
«Kósh sońynda qalǵan óńirler belgilengen KPI qatań saqtaý qajettigine nazar aýdarýy tıis. Nysanaly ındıkatorlarǵa qol jetkizbegeni úshin ákimderge derbes jaýapkershilik júkteledi. Memlekettik organdar men ákimdikter ishki jáne syrtqy ınvestısıalardy tartý boıynsha jumysty júıeli túrde jalǵastyrsyn», — dedi Á. Smaıylov.