Onlaın-kezdesý barysynda taraptar Qazaqstandaǵy qazirgi jaǵdaıdy jáne QR Úkimetiniń bank sektoryna qatysty qysqa merzimdi is-qımyl josparyn talqylady.
QR Premer-Mınıstri Álıhan Smaıylov beınekonferensıa baılanysy rejıminde EQDB banktik operasıalar jónindegi vıse-prezıdenti Alan Pıýmen kelissóz júrgizdi, dep habarlaıdy Almaty-akshamy.kz
QR Premer-Mınıstri teńgege degen senimdi saqtaý jáne qarjylyq turaqtylyqty qamtamasyz etý maqsatynda Ulttyq bank pen Qarjy naryǵyn retteý jáne damytý agenttigi júzege asyrǵan sharalar týraly aıtyp berdi.
Qazaqstannyń bank sektorynyń eleýli kapıtal qory bar ekendigi atap ótildi, bul teris faktorlarǵa qaramastan bankterge turaqtylyqty saqtaýǵa múmkindik beredi. Máselen, osy jyldyń basynan beri bankterdiń jıyntyq aktıvteri 148 mlrd teńgege (0,4%) 37,8 trln teńge kórsetkishine deıin ósti. Menshikti kapıtal 96 mlrd teńgege (2,1%) ósip, 4,6 trln teńgeni qurady.
Kezdesý qorytyndysy boıynsha taraptar iske asyrylyp jatqan jobalar men yntymaqtastyqtyń basqa da baǵyttary boıynsha belsendi ózara is-qımyldy jalǵastyrýǵa kelisti.
Anyqtama: Eýropa qaıta qurý jáne damý banki 1991 jyly qurylǵan, Ortalyq Eýropadan Ortalyq Azıaǵa deıingi elderdegi, sondaı-aq Ońtústik jáne Shyǵys Jerorta teńizi elderindegi jobalardy qarjylandyratyn halyqaralyq qarjy uıymy. Qazaqstan boıynsha 2021 jyly EQDB 18 jobaǵa 558 mln eýro ınvestısıa saldy, onyń 40%-ǵa jýyǵy jasyl ekonomıkaǵa kóshýge baılanysty.