Elena Rybakına joǵary marapat úshin alǵysyn bildirdi.
Qazaqstan Premer-Mınıstri Álıhan Smaıylov Ýımbldon týrnırinde tarıhı jeńiske jetken qazaqstandyq tenısshi Elena Rybakınaǵa II dárejeli «Dostyq» ordenin tabystady, dep habarlaıdy Almaty-akshamy.kz Primeminister.kz saıtyna silteme jasap.
«Barlyq qazaqstandyqtar Sizdiń álemniń eń ataqty tenısshilerimen saıystaryńyzdy baqylap otyrdy. «Úlken dýlyǵa» týrnırinde jeńiske jetip, Siz otandastarymyzdyń úmitin aqtadyńyz, sondaı-aq Qazaqstanda tenısti dáripteýge baǵa jetpes úles qostyńyz. Sizdiń jeńisińiz jas sportshylardy yntalandyra túsedi dep senemin», - dedi Álıhan Smaıylov.
Óz kezeginde Elena Rybakına joǵary marapat úshin alǵysyn bildirip, qazaqstandyqtardyń qoldaýyn sezinip júretinin aıtty.
«Árıne, men otandastarymyzdyń qoldaýyn udaıy sezinemin. Bul men úshin úlken qýanysh pen jaýapkershilik. Keshe Qazaqstanǵa ushyp kelgende meni qarsy alǵan adamdardyń kóp bolǵanyn kórdim. Bul jaǵdaıdyń meniń basymnan ótip jatqanyna áli de sene alar emespin», - dedi ol.
Qazaqstandyq tenısshi júlde qarajatynyń bir bóligin elimizde qaıyrymdylyqqa jáne ıýnıorlardy qoldaýǵa jumsaıtynyn aıtty.
«Meniń oıymsha, týrnır uıymdastyrǵan nemese jas oıynshylarǵa grant taǵaıyndaǵan durys bolady. Sebebi, men munda zor qoldaýǵa ıe boldym. Endi jas býynnyń damýyna meniń kómektesetin kezegim», - dedi Elena Rybakına.
Sondaı-aq, sportshy qarajattyń bir bóligin janýarlarǵa kómektesýge jumsaýdy josparlap otyr.
«Birneshe kúnnen keıin AQSH-ta ótetin týrnırlerge daıyndala bastaımyn. Bıylǵy maqsat – álemdik reıtıńtiń TOP-10 qataryna kirý. Basty maqsat – birinshi bolý. Men buǵan umtylamyn jáne bar kúsh-jigerimdi salamyn», - dedi Ýımbldon-2022 jeńimpazy.
Buǵan deıin habarlaǵanymyzdaı, Memleket basshysynyń Jarlyǵymen sporttaǵy asa úzdik jetistikteri jáne halyqaralyq yntymaqtastyqty damytýǵa qosqan úlesi úshin Qazaqstan Respýblıkasy Mádenıet jáne sport mınıstrliginiń «Sportty damytý dıreksıasy» RMQK sportshy-nusqaýshysy Elena Andreevna Rybakına İİ dárejeli «Dostyq» ordenimen marapattaldy.
Qazaqstannyń birinshi, álemniń 23-raketkasy Elena Rybakına alǵash ret Ýımbldon týrnıriniń chempıony atanǵan bolatyn.
Prezıdent Qasym-Jomart Toqaev Elena Rybakınany tarıhı jeńisimen quttyqtap , halyqaralyq arenada elimizdiń abyroıyn asqaqtatqany úshin alǵys aıtty.
Ýımbldon chempıony Elena Rybakına barsha jankúıerlerine alǵysyn jetkizip, Qazaqstanǵa qaıtatynyn aıtty.