QR Premer-Mınıstri Álıhan Smaıylovtyń tóraǵalyǵymen ótken OMO men JAO ózara is-qımyl jónindegi úılestirý shtabynda «Aýyldyq densaýlyq saqtaýdy jańǵyrtý» ulttyq jobasyn iske asyrý barysy qaraldy, dep habarlaıdy Almaty-akshamy.kz primeminister.kz.
Densaýlyq saqtaý mınıstri Ajar Ǵınıat aldaǵy eki jylda aýyldarda jańa 655 alǵashqy medısınalyq-sanıtarıalyq kómek kórsetý nysandaryn salý boıynsha júrgizilip jatqan jumysty baıandady.
Olardyń qatarynda fızıoterapıa kabıneti men dárihanany, feldsherlik-akýsherlik beketterdi (aqparattandyrý kabıneti qosyldy) jáne dárigerlik ambýlatorıalardy (EDSH zaly qosyldy) qamtıtyn zamanaýı medısınalyq beketter bar.
Fızıoterapıa kabınetteri elektroterapıa, magnıtoterapıa, últradybystyq terapıa, fototerapıa, últrakúlgin terapıasy, ıngalátorlar jáne basqa da qurylǵylarmen jabdyqtalatyny atap ótildi.
ESHD zalynda usaq motorıkany qalpyna keltirý men damytýǵa arnalǵan túrli trenajerlar, ergoterapıaǵa arnalǵan stendter, shved qabyrǵasy, kınezoterapıaǵa arnalǵan jabdyqtar qarastyrylǵan.
Sonymen qatar barlyq jańa MSAK nysandary telemedısınany uıymdastyrý úshin kompúterlik jáne medısınalyq jabdyqtarmen qamtamasyz etilgen.
Ulttyq joba sheńberinde ınsýlt jáne kardıologıalyq ortalyqtar, ońaltý, travmatologıa jáne ortopedıa, hırýrgıa, reanımasıa, qarqyndy terapıa bólimsheleri ashylyp, kópbeıindi ortalyq aýdandyq 32 aýrýhanany jańǵyrtý jáne kúrdeli jóndeý, sondaı-aq zamanaýı medısınalyq jabdyqtarmen jaraqtandyrý jumystary júrgiziledi.
Sonymen qatar aýyldyq densaýlyq saqtaý mekemeleri úshin 1100 medısına qyzmetkerin daıarlaý josparlanǵan.
Olardyń arasynda dárigerler, medbıkeler, feldsherler men akýsherler bar.
Indýstrıa jáne ınfraqurylymdyq damý mınıstri Marat Qarabaev jańa medısınalyq nysandardyń úlgilik jobalaryn jergilikti jaǵdaıǵa beıimdeý jumystary týraly aıtty.
Ulttyq jobanyń óńirlerde júzege asyrylý barysy týraly Atyraý oblysynyń ákimi Serik Shápkenov, Qostanaı oblysynyń ákimi Qumar Aqsaqalov, Mańǵystaý oblysynyń ákimi Nurlan Noǵaev jáne Qaraǵandy oblysynyń ákimi Ermaǵanbet Bólekpaev baıandady.
Úkimet basshysy jıyndy qorytyndylaı kele, úlgilik jobalardy jergilikti jaǵdaımen baılanystyrý, sondaı-aq qurylys alańdaryna ınjenerlik komýnıkasıa men jol tartý jumysyn jedeldetýdi talap etti.
Sonymen qatar Álıhan Smaıylov Densaýlyq saqtaý mınıstrligi Ulttyq jobany úılestirý men baqylaýdy kúsheıtýi qajet ekenin atap ótti.