Álıhan Smaıylov Astanadaǵy 3-JEO men eki jańa GJS qurylysyn tekserdi
12 tamyz kúni QR Premer-Mınıstri Álıhan Smaıylov Astanadaǵy «Turan» jáne «Ońtústik-SHyǵys» gaz jylý stansalary (GJS) men 3-JEO qurylysynyń barysymen tanysty.
Qazirgi tańda 3-JEO-da jumys 90% oryndalǵan. Bıyl barlyq 4 qazandyqty (gaz) kezeń-kezeńimen iske qosý josparlanyp otyr, bul elordadaǵy jylý qýatyn qosymsha 440 Gkal/saǵ arttyrýǵa múmkindik beredi.
Nysanda Premer-Mınıstrge «OAEK» AQ aksıoneri Sergeı Kan qurylys, iske qosý-retteý jumystarynyń júrgizilý jáne aǵymdaǵy tehnıkalyq máselelerdi sheshý barysy týraly baıandady.
Álıhan Smaıylov bul jobanyń qala halqy úshin mańyzdy áleýmettik mańyzdylyǵyn jáne ony iske qosý máselesi Memleket basshysynyń erekshe baqylaýynda ekenin atap ótti.
«Aldaǵy jylytý maýsymynda qazandyqtardyń bárin paıdalanýǵa berip, qalany qosymsha jylýmen qamtamasyz etý óte mańyzdy. Qala ákimdigi nysandy ýaqtyly iske qosý boıynsha barlyq qajetti sharalardy qabyldaýy tıis», — dedi ol.
Sodan keıin Premer-Mınıstr elordany shamamen 350 Gkal/saǵ kóleminde qosymsha jylýmen qamtamasyz etetin «Turan» gaz jylý stansasyna bardy. Onda jobanyń qajetti qarjymen qamtamasyz etilgeni, jumys kestege saı júrgizilip jatqany aıtyldy.
Odan ári úkimettik delegasıa jalpy qýaty 350 Gkal/saǵ bolatyn jáne sol jaǵalaý aımaǵyn qamtýy tıis «Ońtústik-SHyǵys» gaz jylý stansasynyń qurylysyn tekserdi.
«Qurylys jospar boıynsha júrip jatyr. Biz qurylystyń barysy men merziminde oryndalýyn qadaǵalaıtyn bolamyz, óıtkeni bul másele astanalyqtar úshin qys mezgilinde óte mańyzdy», — dedi Álıhan Smaıylov.
Jalpy, jańa GJS-nyń artyqshylyǵy – tabıǵı gazdy únemdi tutynýǵa múmkindik beretin shaǵyn qazandyqtar. Tabıǵı gazdan basqa, olar dızelmen jumys isteýge arnalǵan.
«Qazir bizde eki gaz qazandyǵy bar, jańa jylý elektr ortalyǵy iske qosylyp jatyr. Bul aldaǵy jylytý maýsymynda qalany shamamen 1100 Gkal/saǵ jylýmen qamtamasyz etedi, demek, biz jylýdy artyǵymen berýge jumys istep jatyrmyz. Sondaı-aq elordany bolashaqta jylýmen turaqty túrde qamtamasyz etý úshin kelesi jyly qosymsha gaz qazandyqtaryn engizý josparlanyp otyr», — dedi Álıhan Smaıylov.