Prezıdent Ulttyq ekonomıka mınıstri Álibek Qýantyrovty qabyldady
Memleket basshysyna elimizdiń bıylǵy 10 aıdaǵy áleýmettik-ekonomıkalyq damýynyń aldyn-ala nátıjeleri týraly esep berildi, dep habarlaıdy almaty-akshamy.kz
Qasym-Jomart Toqaevqa 2023 jyldyń qorytyndysy boıynsha jalpy ishki ónimniń ósimi 5 paıyz kóleminde bolady degen boljam jasalyp otyrǵany jóninde baıandaldy. Birinshi jartyjyldyqta shetelden tartylǵan tikeleı ınvestısıa kólemi 13,3 mıllıard dollarǵa jetti. Jyldyq ınflásıa 2 ese, ıaǵnı 10,8 paıyzǵa deıin (aqpan aıynda 21,3 paıyz) tómendedi.
Álibek Qýantyrov jalpy ishki ónimdegi shaǵyn jáne orta bıznestiń úlesi 36,4 paıyzǵa jetkenin málimdedi. Bul – rekordtyq kórsetkish. Shaǵyn jáne orta bıznes óndirgen ónim kólemi 28 trıllıon teńgeden asty. Bul salada 4,3 mıllıon adam jumyspen qamtylǵan. Bıyl 9 myń jobaǵa sýbsıdıa berildi. Nesıeniń jalpy kólemi – 669 mıllıard teńge.
Memleket basshysyna bıznesti tekserý isin 2 ese azaıtý úshin kásipkerlik salasyna jańa retteý saıasaty engiziletini týraly málimet berildi. Mindetti talaptar reestri jasalyp, syn-qaterlerdi basqarý júıesi avtomattandyrylady.
Qasym-Jomart Toqaevqa jańa Búdjet jáne Salyq kodeksteriniń ázirlený barysy, sondaı-aq ınvestısıalyq saıasat, memlekettik-jekeshelik áriptestikti damytý sharalary týraly aıtyldy.
Budan bólek, Ulttyq ekonomıka mınıstri «Tarıfti ınvestısıaǵa aıyrbastaý» baǵdarlamasynyń júzege asyrylýy jóninde baıandady. Atap aıtqanda, bıyl 267 mıllıard teńge ınvestısıa tartý, 5,8 myń shaqyrym jelini jóndeý, turǵyn-úı komýnaldyq sharýashylyq salasy qyzmetkerleriniń jalaqysyn 50 paıyzǵa kóterý, jelilerdiń tozý deńgeıin 3,2 paıyzǵa azaıtý josparlanyp otyr.
Prezıdentke Aýyldyq aýmaqtardy damytý tujyrymdamasynyń iske asyrylýy jaıynda málimet berildi. «Aýyl – el besigi» baǵdarlamasy iske qosylǵaly beri respýblıkalyq búdjetten qarjylandyrý kólemi 7 ese artty. Bıyl 771 aýylda 1,8 myń jobany oryndaý josparlanyp otyr.
Kezdesý sońynda Qasym-Jomart Toqaev sapaly jáne ornyqty ekonomıkalyq ósimdi qamtamasyz etý, sondaı-aq reformalardy tıimdi júrgizý jumystaryn jalǵastyrýdy tapsyrdy.