Almatyda Qazaqstan halqy Assambleıasynyń 30 jyldyǵy men Alǵys aıtý kúnine arnalǵan merekelik konsert ótti, dep habarlaıdy aqshamnews.kz
«Alataý» dástúrli óner teatrynda Alǵys aıtý kúni men Qazaqstan halqy Assambleıasynyń 30 jyldyǵyna arnalǵan «Alǵysym saǵan, Qazaqstan!» atty konsert ótti. Bul kúni almatylyqtar men qala qonaqtary mýzyka, bı jáne poezıany toǵystyrǵan jarqynmerekelik baǵdarlamanyń kýási boldy.
İs-shara barysynda Almaty qalasynyń ákimi atynan Qazaqstan halqy Assambleıasynyń ókilderi jáne etnomádenı birlestik basshylary mádenıet, bilim salasynda, jalpy qoǵamnyń damýyna qosqan eleýli úlesi úshin alǵys hattarmen marapattaldy.
Konserttik baǵdarlamada tanymal artıser men shyǵarmashylyq ujymdardyń óner kórsetti. Qazaqstan halqynyń bir shańyraq astynda birligin beıneleıtin «Qazaqstan – ortaq úıimiz» horeografıalyq kompozısıasyn QR Memlekettik «Saltanat» bı ansambli oryndady. M.Áýezov atyndaǵy Qazaq ulttyq drama teatrynyń artıseri Qalqaman Sarınniń shyǵarmasy negizinde «Alǵys» poetıkalyq qoıylymyn usyndy. Mýzykalyq bólimde Roman Kım «Uly dala» ánin, «Ulytaý» etno-rok toby «Iapýraı-aı» jáne «Saryarqa» kompozısıalaryn, Oleg Tatamırov «Blagodarú tebá» ánin, «KeshYOU» toby «Týǵan jer» jáne «Rızamyn» ánderin, Parvız Nazarov «Dıdor» ánin oryndady.
Dárigerler, muǵalimder jáne basqa da kásip ıeleriniń eńbegi Igor Blagodarnyı, Gaýhar Ibragım jáne Dınara Qyryqbaevanyń «Razgovor dvýh vracheı» jáne «Ustazym» kompozısıalarynda kórinis tapty. Sondaı-aq, «IL Canto» kvarteti «Kúshti adamdar» týyndysymen, «Dervıshı» toby «Baıram» jáne «Gúl Almaty» ánderimen kópshilikti tánti etti.
Konsert Birjan Hasanǵalıev, Tólegen Rahymbaev, Islam Hamzaev, Shahzoda Sana, Bekzat Ábıtov jáne Oljas Jubatqanovtyń oryndaýyndaǵy «Atameken» ánimen aıaqtaldy.
Bul is-shara shynaıy rızashylyq, úılesim men birliktiń merekesine aınalyp, qoǵamdaǵy ózara túsinistik pen qurmettiń mańyzdylyǵyn eske saldy.