Almaty qalasyna jumys saparynda Svetlana Jaqypova ataýly áleýmettik kómek taǵaıyndaýdyń jańa tásilderin ázirleý týraly aıtyp ótti, dep habarlaıdy almaty-akshamy.kz
«Bıyl 7 aqpandaǵy Úkimettiń keńeıtilgen otyrysynda Memleket basshysy áleýmettik kómek pen qoldaý júıelerin qaıta qaraý mindetin qoıdy. Osyǵan baılanysty Otbasynyń sıfrlyq kartasyn jáne memlekettik jáne memlekettik emes uıymdardyń júıelerimen jańa ıntegrasıalardy paıdalana otyryp, AÁK tolyq transformasıalanady.
Almatyda jyl basynan beri 11 myńǵa jýyq adam AÁK alǵanyn aıta kelip, mınıstr: «Muqtaj otbasylarǵa keshendi qoldaý kórsetýdiń naqty reglamenti ázirlenedi, al onyń quramyna AÁK, turǵyn úı kómegi, jalǵa beriletin turǵyn úıdi jaldaýdy sýbsıdıalaý, jeńildikpen jol júrý jáne t.b. kiredi. Kómek tek azyq-túlik satyp alýǵa ǵana emes, ómir súrý úshin qalypty jaǵdaı jasaýǵa da beriletin bolady», – dedi.
Múgedektigi bar adamdardyń ómir súrý sapasyn arttyrý jáne olardyń qoǵamǵa áleýmettik yqpaldasýy maqsatynda keshendi sharalar qabyldandy. Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar iske asyrylýda. 2023 jyly Múgedekterdiń quqyqtary týraly konvensıaǵa Fakúltatıvtik hattama ratıfıkasıalandy.
«Áleýmettik kodeks qabyldandy, oǵan birqatar qosymsha áleýmettik qoldaý sharalary engizildi: jórgekterdi berý normalary eki ese ulǵaıdy; «Spına bıfıda» dıagnozy qoıylǵan múgedektigi bar adamdar joǵary sapaly kateterlermen qamtamasyz etiledi; mentaldi buzylýy bar balalarǵa arnalǵan sanatorıılik-kýrorttyq emdeýdi usyný boıynsha pılot iske qosyldy; 1-top múgedektigi bar adamdardyń jeke kómekshileri úshin zeınetaqy, áleýmettik jáne medısınalyq jarnalar aýdarylady», – dedi Svetlana Jaqypova.
Memleket basshysynyń tapsyrmasy boıynsha 2025 jylǵa deıin ártúrli óńirlerde eresekter men balalarǵa arnalǵan 12 ońaltý ortalyǵyn salý jumystary júrgizilýde.
Sonymen qatar elimizdiń 6 óńirinde (Shyǵys Qazaqstan, Qostanaı, Pavlodar, Jetisý, Jambyl oblystary jáne Shymkent q.) aýtızm spektri buzylǵan jáne basqa da aqyl-oı kemistigi bar balalarǵa arnalǵan kúndizgi bolý ortalyqtary ashyldy.
Sondaı-aq, múgedektigi bar adamdardyń ómir súrý sapasyn jaqsartý úshin birneshe pılottyq jobalar iske asyrylýda. Olar syrttaı proaktıvti formatta múgedektikti belgileý; Astana jáne Almaty qalalarynda taksı agregatorlary arqyly ınvataksı qyzmetterin kórsetý; 6 óńirde syıymdylyǵy shaǵyn úılerdi engizý; 4 óńirde múgedektigi bar balalarǵa arnalǵan tehnıkalyq ońaltý quraldaryn jeke tańdaý.
«2024 jyly birneshe negizgi baǵyttar boıynsha jumys júrgizilýde: QR ınklúzıvti saıasat tujyrymdamasyn qabyldaý; olardyń tıimdiligi men sapasyn arttyrý úshin áleýmettik qyzmetter kórsetý júıesin transformasıalaý; halyqqa áleýmettik qyzmet kórsetý ortalyqtarynyń qyzmetin sıfrlandyrý; tehnıkalyq ońaltý quraldary men qyzmetterdiń keıbir túrlerin monetızasıalaý; aýyldyq jerde turatyn múgedektigi bar adamdar úshin ońaltý tehnologıalaryn engizý; ońaltýdyń sıfrlyq kúndeligin ázirleý; áleýmettik jáne kásiptik ońaltýdyń sıfrlyq hattamalaryn engizý; áleýmettik salany damytýdyń Ulttyq ǵylymı ortalyǵyn jańǵyrtý.
«Osy baǵyttardy iske asyrý ádiletti qoǵamdy damytýdyń negizgi faktory bolyp tabylady. Biz neǵurlym jetildirilgen jáne ınklúzıvti áleýmettik saıasat qurý maqsatynda ashyq dıalog pen syndarly yntymaqtastyqqa daıynbyz», – dep atap ótti mınıstr.
EHÁQM basshysy halyqty jumyspen qamtý sharalary týraly da habarlady.
«2023 jyly Almatyda 97,5 myńnan astam adam jumysqa ornalastyryldy. Kásiptik oqytýmen 4,1 myńǵa jýyq adam qamtyldy. Kásipkerlik bastamalarǵa qoldaý kórsetý aıasynda halyqtyń áleýmettik osal toptaryna 375 grant jáne jas kásipkerlerge 135 mıkrokredıt berildi. Bıyl jańa bıznes-ıdeıalardy iske asyrýǵa 358 grant berý josparlanýda. Qujattardy qabyldaý prosesi tolyǵymen avtomattandyrylǵan jáne business.enbek.kz portaly arqyly júzege asyrylady», – dedi Svetlana Jaqypova.
Jıyndy qorytyndylaı kele mınıstr almatylyqtardy qyzyqtyrǵan barlyq suraqtarǵa tolyqqandy jaýap berdi.