Áleýmettik qyzmetter portaly fýnksıonalynyń qoljetimdiligin arttyrý úshin múgedektigi bar adamdar ońaltýdyń jeke baǵdarlamalaryna sáıkes ońaltýdyń tehnıkalyq kompensatorlyq quraldaryna tapsyrys bere alatyn «Aleumet» qosymshasy ázirlenip, iske qosyldy, dep habarlaıdy Almaty-akshamy.kz.
Bolashaqta bul qosymshanyń fýnksıonaldyǵy keńeıedi, múgedektigi bar adamdarǵa usynylatyn basqa qyzmetterge tapsyrys berý múmkindigi paıda bolmaq. Olarǵa sanatorlyq-kýrorttyq emdeý, ymdaý tili mamany, jeke kómekshi jáne basqa da arnaıy áleýmettik qyzmetter qosylady.
Esterińizge sala keteıik, 2023 jyldyń basynan bastap múgedektigi bar adamdar Áleýmettik qyzmetter portaly arqyly 377 myńnan astam qyzmet aldy, olardyń basym bóligi ońaltýdyń tehnıkalyq quraldary (budan ári – OTQ) bolyp tabylady.
Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshi men jetkizýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq sıfrlyq qoltańbasymen rastaý arqyly júzege asyrylady. Tapsyrys berilgen OTQ-ny jetkizip berý de múmkindigimen qatar tapsyrys ıesi ózi de alyp kete alady.
Búgingi kúni Áleýmettik qyzmetter portalynda arnaýly áleýmettik qyzmetter kórsetetin 859 medısınalyq-áleýmettik mekemeler (bólimsheler), 482 OTQ jetkizýshiler, 27 myńnan astam jeke kómekshi, 703 ymdaý tili mamany jáne 104 sanatorlyq-kýrorttyq emdeý qyzmetin berýshi tirkelgen.
«Áleýmettik qyzmetter portaly» avtomattandyrylǵan aqparattyq júıesin engizý múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi Ulttyq jospar sheńberinde kózdelgen.
Portaldy paıdalaný boıynsha konsýltasıalardy 1414 biryńǵaı nómiri arqyly baılanys ortalyǵynan alýǵa bolady.