Halyqaralyq kitap jáne polıgrafıa jármeńkesi ótti.
Megapolıste úsh kún qatarynan «Atakent» Qazaqstan iskerlik yntymaqtastyq ortalyǵynda onynshy ret «Uly Jibek jolymen–2022» halyqaralyq kitap jáne polıgrafıa jármeńkesi ótti, dep habarlaıdy Almaty-akshamy.kz.
Atalmysh sharany QR Mádenıet jáne sport mınıstrliginiń qoldaýymen «Atakent-Ekspo» Halyqaralyq kórme kompanıasy men QR Ulttyq memlekettik kitap palatasy, Qazaqstannyń baspagerler, polıgrafıster jáne kitap taratýshylar qaýymdastyǵymen birlesip uıymdastyrdy.
«Bul kórme qalamyzda 10 jyl qatarynan ótip kele jatyr. Sońǵy 2-3 jylda pandemıaǵa baılanysty toqtap qalǵan edi. Mine, endi qaıta qolǵa alyp jatyrmyz. Aldaǵy ýaqytta jyl saıyn ótkizemiz degen josparymyz bar. Kórmege álemniń túkpir-túkpirinen myqty-myqty baspalar kelip, ózderiniń jumystaryn tanystyryp jatyr. Qazaqstandyq kóptegen baspagerler de kitaptaryn kórmege qoıyp jatyr. Sondaı-aq, sheteldik baspagerlermen tanysyp, tájirıbe almasyp otyrǵan jaıymyz bar. Ár el ózderiniń jazýshylarynyń shyǵarmalaryn, ultyq dúnıetanymnan habar beretin shyǵarmalaryn oqyrman nazaryna usynýda. Baǵdarlama aıasynda jazýshylar men baspagerler óz oı-tolǵanystaryn ortaǵa salyp, jastarmen qyzyqty áńgime órbýde. Úzdik baspagerler anyqtalyp, olarǵa baǵaly syılyqtar da tabystaldy», – deıdi QR Ulttyq memlekettik Kitap palatasynyń dırektory Ádil Qoıtanov.
Kórmede Qazaqstan, Reseı, Qyrǵyzstan, Ózbekstan elderiniń jetekshi baspalary, polıgrafıalyq kompanıalary men kitaphanalary, sondaı-aq, Iran Islam Respýblıkasynyń Almaty qalasyndaǵy Bas konsýldyǵynyń mádenı ókilderi qatysty.
«Qazaqstanda úsh kún qatarynan kitap toıy boldy. Alys-jaqyn elderdiń barlyǵy shaqyryldy. Onyń ishinde qyrǵyz aǵaıyndar, biz de barmyz. Jármeńkege eń úzdik 50 baspagerlerdiń 500-ge jýyq kitaptaryn ala keldik. Onyń birqatary – Qyrǵyzstannyń halyq jazýshysy Shyńǵys Aıtmatovtyń shyǵarmalary. Sondaı-aq, Qyrǵyzstannyń tarıhy, salt-dástúri jaıly jazylǵan kitaptar da bar. Kishkentaı balalarǵa arnalǵan kitaptar da qoıylyp jatyr. Qazir qarap otyrsam, jármeńke óte joǵary deńgeıde uıymdastyrylǵan. Mundaı jármeńkeler kóp bolsa, yntymaqtastyǵymyz, birligimiz de arta beretini sózsiz», – deıdi Qyrǵyzstan memlekettik Kitap palatasynyń dırektory Koıchýman Momýnkýlov.
Atalmysh is-sharada QR Ulttyq memlekettik kitap palatasynyń 85 jyldyq mereıtoıyna arnalǵan ǵylymı-praktıkalyq konferensıasy uıymdastyryldy. Sondaı-aq, Bookfund.kz kitaptardyń aqparattyq-anyqtamalyq júıesiniń tanystyrylymy ótti. «Naryqtaǵy kitap isi: búgin men bolashaq» atty elimizdiń barlyq óńirinen kelgen baspagerlerdiń kezdesýi boldy. Budan bólek, «Kitap isi naryǵynda sheteldik baspa mekemelerimen tájirıbe almasý» atty dóńgelek ústel uıymdastyryldy.
«Bizdiń baspa «Uly Jibek joly» kórmesi bastalǵaly 10 jyl qatarynan qala kelbetin aıshyqtaıtyn kitaptar men aqyn-jazýshylardyń shyǵarmalaryn usynyp keledi. Kitapqa qyzyǵýshylyq tanytyp jatqan jastarymyzdy kórip, qýanyp otyrmyz. Osy kórmege «Meniń Qazaqstanym!» serıasy boıynsha "Qazaqtyń salt-dástúrleri", "Quraq kórpe", "Shańyraq" degen kitaptardy alyp keldik. «Almaty kitap» baspasy kóbine sheteldik týrıserge káde-syı retinde arnalǵan kitaptardy usynady. Sondaı-aq, bıyl Balalar jyly dep jarıalaǵanyna baılanysty búldirshinderge arnalǵan bazarlyǵymyz da bar», – deıdi «Almatykitap» baspasynyń qyzmetkeri Gúlmaral Qabdolshaeva.
Sondaı-aq, jármeńkede belgili qalamgerlermen jáne jas avtorlarmen kezdesýler, jańadan shyqqan kitaptardyń tanystyrylymy, túrli konserttik qoıylymdar men jyr keshteri uıymdastyrylady. Balalar jyly aıasynda jetkinshekterdiń shyǵarmashylyǵyn qoldaýǵa arnalǵan ádebı oıyndar men jumbaqtar, óleń oqý jáne t.b. balalar baǵdarlamasy ázirlendi.
Sonymen qatar, kórme aıasynda 2020–2022 jyldar aralyǵynda jaryqqa shyqqan kitaptar arasyndaǵy baıqaýdyń jeńimpazdary marapattaldy. Bul baıqaý alty nomınasıa boıynsha, ıaǵnı «Jyl kitaby», «Úzdik kórkem basylym», «Úzdik oqýlyq», «Balalar men jasóspirimderge arnalǵan úzdik kórkem jáne tanymdyq basylym», «Úzdik fotoalbom», «Úzdik polıgrafıalyq oryndaý» nomınasıasy boıynsha jeńimpazdar anyqtalady.
