Ol velosıpedpen álemniń 40 elinde bolyp, 400 myń shaqyrym jol júrgen.
Eń uzaq velosaıahat jasaǵany úshin Qazaqstannyń rekordtar kitabyna da engen, dep habarlaıdy aqshamnews.kz.
Oǵan qosa kir tasyn kóteredi. Túgelbek qarıa bıyl 80-ge keldi. Áli tyń. Qımyl-qozǵalysy shıraq. Ózi: «Osynyń bári – sporttyń arqasy», – deıdi.
Velosıpedke 45 jasynda otyrǵan. Mamandyǵy – muǵalim. Zeınetke shyqqanǵa deıin Shyǵys Qazaqstan oblysynyń Tarbaǵataı óńirinde mektepte matematıkadan sabaq berdi. Bas kezinde balalarǵa úlgi bolǵysy kelgen. Keıinnen sportqa túbegeıli den qoıǵan.
Túgelbek Qasymov, ardager velomarafonshy: - Eń alǵashqy 45 jasta Kabardın Balkar degen elde KSRO boıynsha jarys bolady dep velomarafonǵa shaqyrdy. Sol kezde İİİ oryn, qola medal alamyn. 60 shaqyrym qashyqtyqta. Sonyń ózi sport sheberi degen dárejege saı bolǵan. Sport sheberlerimen jarysqannan keıin, İİİ oryn alǵannan keıin aldyńǵy qatarǵa shyǵýym kerek. Qazaqstannyń birinshi velomarafonshysy bolýym kerek degen maqsat qoıamyn.
Sol kezde aýylda otyryp, qaıda baratynyn anyqtap, kartasyn syzyp alady. Alǵashqy jarystan júldeli qaıtqan soń demeýshiler de tabyla bastaǵan. Sodan keıin 25 ret saıahatqa shyqqan. Bir shyqqanda birneshe memleketti bir-aq aralap qaıtqan kezderi bolǵan.
40 memlekette boldym. Eýropa, Azıa deıdi ǵoı. Odan keıin Mońǵolıa, Japonıa, odan keıin Latyn Amerkasynan ary Kýba, solarǵa deıin bardym. 2017 jyly Astanadan Máskeýge deıin bardym. Eń uzaq jol osy boldy. Oral taýlarynan ótý kerek. 4 myń shaqyrym araqashyqtyq. Kúnine 200-235 shaqyrym alyp otyrdym, deıdi ol.
Rasynda, velosıpedpen júrgen soń qaı jerge barmasyn saıahat ońaıǵa túspegen. Tipti buzaqylardyń shabýylyna toıtarys bergen kezderi de bolypty. Onyń árbir saparynyń tarıhy bar.
Túgelbek Qasymov, ardager velomarafonshy: - 2004 jyly Úndistanǵa bardym. 2004-te Qasym-Jomart Toqaev Syrtqy ister mınıstri bolatyn. Sol kisi «soprovojdat» etkizdi. Ómiri oılamaǵam.
Túgelbek Qasymov velosıpedten bólek, moınymen gir tasyn kóteredi. Qazirdiń ózinde 100-ge deıin jetkizedi. Oǵan qosa tizesin jerge tıgizbeı rolıkpen jattyǵady. Júgiretini jáne bar. Talaı marafonda top jardy. Áli kúnge deıin sport dese ishken asyn jerge qoıady. «Qazirgi jastardyń qozǵalysy az. Ol aýrýǵa ákeledi», – dep keıip otyr.
- Júgirýdiń ornyna elektromobılge túsip alatyn boldy. Raqat, eshkimniń aıaǵy júrmeıdi. Sonda adamǵa aıaq kerek joq sekildi ǵoı. Adamnyń densaýlyǵy adamnyń aıaǵyna baılanysty. Men sony uqtym. Aıaq júrekti kúsheıtedi. Óıtkeni siz júrekti qolǵa alyp kúsheıte almaısyz, deıdi qart spolrtshy.
Túgelbek qart 15 jyldan beri Almatyda turyp jatyr. Ázirge velosıpedimen qoshtasqysy joq. Qysy-jazy tebedi. Júrgen jerinde beıbitshilikti, sportty nasıhattaıdy.