Birqatar memlekette onyń 30-dan asa kórmesi ótken
Berlındegi qazaq sýretshisi Bolat Mekebaev Elordaǵa keldi. Ol Táýelsizdiktiń 30 jyldyǵy qarsańynda týǵan jerinde jeke kórmesin ótkizip jatyr, dep habarlaıdy Almaty-akshamy.kz «Habar 24» telearnasyna silteme jasap.
Bas qala turǵyndary men qonaqtary erekshe stıldegi týyndylardy tamashalaı alady. Qylqalam sheberiniń endigi jospary qandaı?
Aspandıar – bolashaǵynan úlken úmit kúttirer óren. Jas sýretshiniń ata-anasy 25 jyl buryn Germanıaǵa kóship ketken Bolat Mekebaevtyń Elordaǵa kelgenin estip, batasyn alýǵa nıettenipti.
«Men Germanıada 25 jyl turdym. Janyńa ne kerek, bári bar. Tamaǵyńdy berip jatyr. Aqshańdy tólep jatyr. Biraq qazaqtar úshin kishkene qıyndaý. Salt-dástúr basqasha. Ol jaqtyń adamdary kishkene qattylaý, salqyndaý. Biz, qazaqtar, bir-birimizge janymyzdy berýge daıyn turamyz ǵoı»,-deıdi Bolat Mekebaev.
Berlındegi qazaq sýretshisin búkil álem tanıdy. Birqatar memlekette onyń 30-dan asa kórmesi ótken. Óner ıesi jaıly «Qazaqstan álemi» atty kitap shyǵaryldy. Biraq ol ózinen góri ultynyń asqaqtaǵanyn jón kóredi. Sol sebepti Germanıa astanasynda Abaıdyń eskertkishin ashýǵa baryn saldy.
«Burynnan oıda júrgen ıdeıamyz osy jyly júzege asty. Qaırat degen jaqsy jigit demeýshi boldy. Abaıymyz el astanasy Berlınde tur»,-deıdi sýretshi.
Bolat Mekebaev qylqalamdy ǵana emes, qur qalamdy da serik etedi. Onyń Qazaqstandaǵy nemister jaıly romany kópshilik kóńilinen shyqty. Elge oralýdy josparlap júrgen ol osy taqyrypta fılm túsirýdi armandaıdy.
«Qazaqstanda nemister kóp turady. Qazaqsha ándi de keremet aıtady. Báke, bizge bir kórkemfılm kerek deıdi. Ol usynystaryn áli umytqam joq. Qazaq pen nemiske ortaq bir týyndy dúnıege ákelýdi oılap júrmin,-deıdi B.Mekebaev.
Bolat Mekebaev bul saparynda elge 20-dan astam sýretin ala kelgen. Jeke kórme elorda men Kókshetaý jurtshylyǵyna usynylady. Adamzatty tolǵandyrǵan máseleler beınelengen týyndylar kórermendi tánti eteri sózsiz.