Qalanyń qarbalas tirshiliginde kólikke táýeldi árqaısymyz úshin jaıaý júrý sırek ádetke aınalyp barady. Jaıaý júrý – burynǵydaı kúndelikti qajettilik emes, umyt bola bastaǵan daǵdy sekildi. Al dál osyndaı zamanda jaıaý júrýdi hobbı emes, ómirlik saltyna aınaldyrǵan Asqat Qajytaı esimdi Qaraǵandylyq azamat Túrkıadan Grýzıaǵa deıin 1111 shaqyrymdy jaıaý júrip ótken. "Álemdi jaıaý aralaımyn" degen uranmen saparǵa shyqqan saıahatshy jaıaý júrýdiń adam densaýlyǵyna ǵana emes, jan dúnıesine de paıdasy zor ekenin aıtady. Aqshamnews.kz tilshisi «JaıaýMan» atanǵan jıhankezben suhbattasty.
Asqat Qajytaı – Qaraǵandy oblysy, Aqtoǵaı óńiriniń týmasy. Balalyq shaǵy Qyzylaraı taýynyń baýraıynda ótken azamat, tabıǵatty súıip, bala kúninen jaıaý júrýdi súıip, ońasha serýendeýdi ádetke aınaldyrǵanyn atap ótti. Jurt Asqat Qajytaıdy «JaıaýMan» dep atap ketken.
Alǵashqy shaqyrymdar
Jaıaý júrýge degen qushtarlyq bala kezden qalǵan asqaq armannan bastalǵan Asqat myrzanyń ózinshe, týǵan jerge degen ystyq mahabbat berik maqsatqa aınalyp, uzaq saparǵa jetelegen.
«2000-jyldary 5-synyp oqyp júrgenimde ákemniń jumysyna baılanysta basqa aýylǵa kóshtik. Sol kezde Aqsorańmen qımaı qoshtastym. Jasym 11-12 shamasynda bolatyn. Sol sátte “Aqsorańym, men saǵanálemniń qaı túkpirinen bolsyn jaıaý bolsyn qaıta kelemin” dep bala kóńilmen ýáde bergenim esimde. Sol ýádemdi 2021 jyly oryndadym. Alǵash ret Qaraǵandydan Aqsorańǵa deıin 7 kún ishinde 333 km jaıaý júrip óttim. Marafon sońynda teńiz deńgeıinen 1565 metr bıiktiktegi Aqsorań shyńyna shyǵyp, tý tiktim. Alǵashqy saparym osylaı bastalǵan edi» deıdi «JaıaýMan».
«Dárigerler jaıaý júrýime qarsy boldy»
Alǵashqy uzaq saparyn artqa tastaǵan azamat aldynan shyqqan kedergilerge de moıynsunbaǵan. Aıtýynsha, dárigerler uzaq saparǵa shyǵýyna qarsy bolyp, densaýlyǵyn kútýge shaqyrǵan. Dese de jan qalaýyna erik bergen JaıaýMan uzaq shaqyrymdaryn qaıta bastaǵan.
«Bala armanym oryndaldy ǵoı, qoıamyn-aý degen oıda bolyp edim. Biraq taǵy daıyndalyp Qaraǵandydan Ulytaýǵa deıin 777 shaqyrym júrip óttim. Bul meniń Qazaqstandaǵy ekinshi uzaq saparym boldy» dedi ol.
1111 shaqyrym qalaı eńserildi?
2024 jyly jaz aıynda Asqat Qajytaı sheteldegi alǵashqy uzaq saparyn sátti aıaqtady. Saparǵa shyqpas buryn JaıaýMan Ispanıa men Germanıa memleketi arasynda daıyndyq júrgizgen.
«. Bul saparǵa 1 jyl fızıkalyq-psıhologıalyq turǵyda daıyndaldym. Ispanıaǵa vıza aldym. 7 shilde kúni Astanadan Frankfýrt arqyly ushyp, Madrıdke keldim. Ispanıa astanasynda Eýropa aýa raıyna beıimdelip, aeroporttan áıgili «Real» komandasynyń stadıony Santágo Bernabeýge deıin 33 km jaıaý júrip baryp qaıttym. Keıin Túrkıaǵa jetip, Ankara qalasynan Grýzıanyń Batýmıine deıin 1111 shaqyrym júrip ótti. Sapar ýaqyty 26 kúnge sozyldy» dedi Asqat myrza.
«Jaıaý júrýdiń ózi ǵylym»
Asqat myrza jaıaý júrýdiń kópshilik úshin máselege aınalyp bara jatqanyn, halyq onyń mańyzyn túsinbeı jatqanyn atap ótti.
«Osydan birneshe jyl buryn adamdar jaıaý júrý degen tegin komforttan bas tartady dep eshkim oılamady. Qazir adamdar jaıaý júrýge zar bolyp otyr. Onyń paıdasyn, mańyzyn túsinip otyrǵan joq. Taǵy bir jarty jyldan keıin bul odan saıyn kúrdeli máselege aınalady. Men qazir kúnine kemi 30 shaqyrym júrip otyramyn. Bul meniń aldaǵy josparlarym úshine de kerek dúnıe» deıdi ol.
JaıaýMan endigi saparyn Eýropaǵa josparlap otyrǵanyn aıtty. Qazir ol osy saparǵa daıyndyq júrgizip jatyr.
«Jaıaý júrýdiń ózin adamdar qrapaıym dúnıe dep oılaýy múmkin. Alaıda ol úlken bir ǵylym. Ony árqashan jetildirip otyrý kerek. Birden alys qashyqtyqqa shyǵyp ketýge bolmaıdy. Kúnine 10-15 km júrip tájirıbe jınaqtaýǵa bolady. Uzaq saparǵa shyǵamyn deıtin jandar úshin fızıkalyq daıyndyqtan bólek, psıhologıalyq kúı de asa mańyzdy. Jaıaý júrý júrek jumysyn jaqsartatyn eń jeńil jattyǵý. Kóbi osy paıdasy úshin de jaıaý júrýdi ádetke aınaldyrsa deımin» dep jaýap berdi ol.
