Jas ta bolsa, bul jigit - «Mensa» halyqaralyq qaýymdastyǵynyń múshesi.
Al oǵan álem boıynsha eń joǵary ıntellekt koeffısenti bar adamdar ǵana múshelik etedi.
23 jastaǵy Aldıar Semedárovtyń IQ koeffısenti álemdegi 99 paıyz adamnan joǵary bolyp shyqty. Veksler shkalasymen test nátıjesi 135-ke jetti, dep habarlaıdy Almaty-akshamy.kz Almaty.tv-ǵa silteme jasap.
2016 jyly «Mensa» týraly Aldıar alǵash ret estıdi. Sol kezde álemniń eń aqyldy adamdar tizimine alǵash ret qazaq balasy Dımash Ádilet qosylǵan.
«Mektepte úzdik oqydym. Sonda IQ-ǵa resmı test tapsyrǵym keldi. Biraq, ókinishke qaraı, Qazaqstanda ondaı test bolmaı qaldy. Sodan beri bes jyl ótti»,– deıdi Semedárov.
Eki aı buryn Aldıar onlaın rejımde IQ-testin resmı túrde tapsyrdy. 45 tapsyrmaǵa 20 mınýt biriledi. Al bir aptadan keıin «Mensadan» jaýap kelgen. Uıym ókilderi ony óz qataryna qosqanyn aıtqan. Aldıardyń ıntellekt koeffısentiniń kórsetkishi jer-jahandaǵy adamnyń 99 paıyzynyń aqyl-oıynan joǵary bolyp tur.
«Men uıymnyń jaýabyn kórip tańǵaldym. Alǵashqy kúnderi senbeı júrdim. Artynan «Mensa» jýrnalynyń kezekti sanyna atymdy jazyp, uıym kartasyn jibergennen keıin qandaı qurmetke ıe bolǵanymdy túsindim. Uıymnyń jelisinde paraqsha da ashyp berdi», – dep atap kórsetti Semedárov.
Aıta keteri, «Mensa» – ıntellekt koeffısenti joǵary adamdar kiretin eń tanymal jáne iri uıymdardyń biri. Test baqylaýshylardyń kózinshe tapsyrylady. Ol úshin álemniń 50 elinde ulttyq toptar qurylǵan. Qazirgi kezde qaýymdastyqqa múshe adamdardyń sany 120 myńnan asyp otyr. Olardyń barlyǵy – 100 eldiń ókilderi. Klýb 1946 jyly qurylǵan. Uıymnyń negizgi maqsaty – adamzat paıdasy úshin ıntellekt damytý, tabıǵatty zertteý jumystaryn qoldaý, qaýymdastyqqa múshe bolǵan adamdarǵa zıatkerlik damý jaǵynan jaǵdaı jasaý.
Aldıar Semedárovtyń ózi - Aqtaý qalasynyń týmasy. 2016 jyly №4 mektep-gımnazıasyn «Altyn belgimen» bitirgen. Al UBT-da 124 upaı jınaǵan.
Aldıar – fızıkadan respýblıkalyq olımpıadalardyń júldegeri. Nazarbaev ýnıversıtetinde oqyp júrgende, Work&travel baǵdarlamasymen AQSH-ǵa baryp qaıtty. University at Buffalo-da jazǵy semestrde boldy. Sondaı-aq Germanıadaǵy Leibniz University of Hannover-de zertteý taǵylymdamasynan ótti.
2020 jyly Shveısarıadaǵy ETH Zurich federaldyq tehnologıalyq ınstıtýtyna "Elektr ınjenerıasy" mamandyǵy boıynsha magıstratýraǵa tústi.