Járdemaqyny taǵaıyndaýda memlekettik qyzmetti proaktıvti formatta alý múmkindigi analardy kezekte turýdan qutqardy
QR Eńbek jáne halyqty áleýmettik qorǵaý mınıstrligi «Altyn alqa» jáne «Kúmis alqa» alqalarymen marapattalǵan kóp balaly analarǵa memlekettik járdemaqy taǵaıyndaý boıynsha qyzmetti proaktıvti formatta alý tártibin jeńildetti, dep habarlaıdy Almaty-akshamy.kz QazAqparatqa silteme jasap.
«Kóp balaly analardyń eńbegin atap ótý jáne laıyqty baǵalaý úshin memleket olardy «Altyn alqa» jáne «Kúmis alqa» alqalarymen nagradtaıdy jáne alqa ıeleri tıisti memlekettik járdemaqy alady. Kóp balaly analardyń ýaqytyn únemdeý maqsatynda mınıstrlik 2019 jyldan bastap osy járdemaqyny taǵaıyndaý boıynsha memlekettik qyzmetti proaktıvti formatta alýǵa múmkindik berdi. Bul áıelderdi kezekte turýdan qutqardy, olar memlekettik qyzmetterdi yńǵaıly ýaqytta jáne kez kelgen jerde alady. Kórsetiletin qyzmetti alýshy bir ǵana SMS habarlamaǵa jaýap bere otyryp, járdemaqyny proaktıvti resimdeýge kelisim beredi jáne bank shotyn rastaıdy. Memlekettik qyzmet kórsetý úshin qajetti basqa da málimetter memlekettik organdardyń aqparattyq júıelerinen túsedi», – dedi QR Eńbek jáne halyqty áleýmettik qorǵaý vıse-mınıstri Erbol Ospanov.
Jeńildetilgen tártip memlekettik járdemaqyny proaktıvti formatta taǵaıyndaýdy aıtarlyqtaı arttyrýǵa múmkindik berdi. Osy ózgeristerdiń arqasynda 2021 jyly proaktıvti qyzmet alǵan kóp balaly analardyń sany eki eseden astam – 9 myń adamǵa deıin ósti.