Álemniń 180 eli plasık qoqysty azaıtý boıynsha birlesken jospar qurýda
Fransıa astanasynda álemniń 180 eli plasık qoqysty azaıtý máselelerin talqylaýda. Qujattyń ózin 2024 jyldyń sońyna taman qabyldaý kózdelip otyr, dep habarlaıdy Almaty-akshamy.kz.
24.kz-tiń aqparaty boıynsha, Parıjdegi kezdesý jer sharymyzda plasık qaldyǵyn azaıtýdy kózdegen álem elderiniń ekinshi basqosýy boldy. Sharaǵa qatysýshylar 2040 jylǵa deıin dúnıe júzin plasık qaldyqpen lastaýdy 80 paıyzǵa deıin azaıtýǵa nıetti. BUU keleshek shartty Parıj kelisiminen keıingi eń mańyzdy qujat dep otyr.
«Ýaqyt az. Biz plasıkterdiń qorshaǵan ortany lastaýyn toqtatý úshin tez qımyldaýymyz qajet. Áıtpese tym kesh bolady. Bul iste yntymaqtasyp áreket etý óte mańyzdy», - deıdi úkimetaralyq kelissóz komıtetiniń atqarýshy hatshysy Djıotı Matýr-Fılıpp.
Al álemde ár sekýnd saıyn qorshaǵan ortaǵa 1 júk kóligindeı plasık qoqys tastalady eken. Eger lastaý osy qarqynmen jalǵassa 2050 jylǵa taman qaldyqtan aýaǵa parnıktik gazdyń taraýy 6,5 gıgatonǵa jetedi. Sol sebepti sarapshylar plasık qutyny óńdeý, qaıta paıdalaný jáne ekologıalyq materıaldarmen almastyrý arqyly kúresýdi usynyp otyr.
«Biz plasık ónimderdi óndirý, paıdalaný jáne qoqysqa tastaýǵa deıingi barlyq kezeńdi retteıtin aýqymdy qujatty qabyldaýǵa shaqyramyz. Bul muhıttar men teńizderdiń lastanýyn aldyn alýǵa múmkindik beredi», - deıdi BUU Qorshaǵan ortany qorǵaý baǵdarlamasynyń atqarýshy dırektory Inger Andersen.
Keı memleketter óńdeýge kelmeıtin plasık túrlerin shyǵarýǵa tyıym salýdy qalaıdy. Biraq munaı-hımıa salasy keńinen damyǵan AQSH, Saýd Arabıasy sıaqty elder olardy qaıta óńdeýge basymdyq berilý kerek deıdi.
«Ekonomıkasynda paıdaly qazbalardy ıgerý mańyzdy rolge ıe elder bar. Biz bul memleketter qorshaǵan orta men adamdardyń densaýlyǵyn qorǵaý úshin qajetti sheshimder qabyldaıdy dep úmittenemiz», - deıdi Greenpeace uıymynyń ókili Marıan Ledesma.
Qujatty talqylaý aldaǵy ýaqytta jalǵasady. Keler basqosý qarasha aıynda Kenıa astanasy Naırobıde ótedi. Onda taraptar ár eldiń plasıkten jasalatyn ónimderge qatysty ustanymyn qarastyrýdy josparlap otyr.