Jer júzinde 350 mıllıon adam lýdomanıadan zardap shegip otyr.
Dúnıejúzilik densaýlyq saqtaý uıymynyń deregi osyndaı. Qumar oıyn ásirese AQSH, Germanıa, Kanada jáne Qytaıda tabysty bızneske aınalǵan.
Bul elderde mıllıondaǵan adam osy bir indettiń shyrmaýynan shyǵa almaı júr, dep habarlaıdy Almaty-akshamy.kz 24.kz-ke silteme jasap.
Lýdomanıa boıynsha kósh bastap turǵan el – AQSH.
Turǵyndardyń 85 paıyzy ómirinde kemi bir ret qumar oıyn oınaǵan. Al 40 paıyzy jylyna bir márte oıynhanaǵa bas suǵyp turady eken. Munan bólek, sporttyq oıyndarǵa utys tigetinder de kóp. Ol ásirese jastar arasynda tanymal. Mamandar elde oıynqumarlyq ádetke alkogóldik pen esirtkige táýeldilik qosylyp, psıhıkalyq aýrýǵa shaldyqqandar sany artyp barady deıdi.
Germanıada lýdomanıaǵa shekteý joq
Germanıada lýdomanıaǵa shaldyqqan mıllıonnan asa adam bar. Taǵy 3 mıllıon turǵynda qumar oıynǵa táýeldiliktiń alǵashqy belgileri baıqalǵan. Muny sońǵy zertteýler kórsetken. Óıtkeni munda túrli onlaın-platformalar men oıyn avtomattary jáne kazıno qoljetimdi. Oıynhanalardyń jarnamasy jer-jerde ilýli turady. Soǵan qaramastan zańsyz jumys isteıtinder kezdesedi.
Mıhael Rıze, aldyn ala kómek kórsetý ortalyǵynyń qyzmetkeri: "Germanıada qumar oıyndardy shekteý boıynsha ár óńirdiń erejesi ártúrli. Sondyqtan ár federaldyq aýmaqtyń basshylyǵy óz betinshe sheshim qabyldaıdy. Mysaly, Berlınde oıynhanalar men býkmekerlik keńseler mektepten kemi 200 metr, al bir-birinen 500 metr qashyqtyqta ornalasýy kerek. Osy talapqa saı kelmegenderiniń birazy jabyldy. Qumar oınaýshylar sany da edáýir azaıdy."
Qytaı zańsyz oıynǵa qarsy kúresti kúsheıtti
Qytaıda qumar oıyndar – tabysty bıznes túri. Negizi bul elde qumar oıynǵa tyıym bar. Tek kazıno ortalyǵy sanalatyn Makaoda shekteý joq. Óz elinde oınaı almaǵan turǵyndar shetelde oıynhana tabaldyryǵyn jıi tozdyrady. Syrtqa shyǵarylǵan zańsyz kapıtaldyń besten biri – qumar oıynnyń úlesine tıesili. Sondyqtan Qytaı bıligi zańsyz onlaın-platformalarmen kúresti kúsheıtken.
Japonıa jastary qumar oıyn quryǵyna ilikken
Japonıa halqy kóshe buryshtaryndaǵy oıyn avtomattaryna áýestenip alǵan. Turǵyndardyń 3,6 paıyzynda qumar oıynǵa táýeldilik bar. Ásirese 15 pen 30 jas aralyǵyndaǵylar lýdomanıaǵa baılanǵan. Bul óskeleń urpaqtyń densaýlyǵyna keri áser etip otyr. Keı jaǵdaıda oıynǵa táýeldilik sońy qylmysqa ákep soǵyp jatady.