Japonıa bıyl joǵary jyldamdyqty temirjoldyń 60 jyldyǵyn atap ótip otyr.
Rail-news.kz-tiń málimdeýinshe, 1964 jyly 1 qazanda alǵashqy joǵary jyldamdyqty Shınkansen poıyzy júre bastady, osymen temir jol kóliginiń jańa dáýirdiń bastaldy desek bolady.
Aerodınamıkalyq pishininiń arqasynda «oq» dep atalatyn poıyz Tokıo men Osaka arasyndaǵy joldy 4 saǵat 40 mınýtta júrip ótti, bul sol kezdegi dástúrli poıyzdarǵa qaraǵanda aıtarlyqtaı jyldam boldy, dep habarlaıdy aqshamnews.kz
Búginde Japonıa temirjol kóligi salasyndaǵy jańalyqtarymen álemdi tań qaldyrýda. Shınkansenmen jol júrý ýaqyty 2,5 saǵatqa deıin qysqarǵan, al ortasha jyldamdyǵy saǵatyna 321 shaqyrymdy quraıdy. Poıyzdar adam nópiri kóp kezde úsh-bes mınýt saıyn júredi jáne 1300-ge jýyq jolaýshyny tasymaldaı alady. Bul kórsetkish Amerıka Qurama Shtattaryndaǵy eń jyldam poıyz bolyp tabylatyn Amtrak kompanıasynyń Acela poıyzymen salystyrǵanda joǵary.
Nelikten Japonıa bul tehnologıany damytýda basqa elderden alda boldy? Onyń jaýaby qarapaıym – qajettilik. Ekinshi dúnıejúzilik soǵystan keıin el tez qalpyna keltirilip, modernızasıalandy, bul halyq sanynyń ósýine jáne ýrbanızasıaǵa ákeldi. Tokıo men Osaka sıaqty qalalar jyldam ári tıimdi kólikti qajet etti, al Shınkansen bul qıyndyqtardy eńsere bildi.
Sınkansen iske qosylǵannan beri júrdek poıyz Japonıanyń ınjenerlik sheberligi men kólik salasyndaǵy jetistikteriniń sımvolyna aınaldy. Joba basqa elderdiń nazaryn tez ilikti. Mysaly, Fransıa soǵan qarap óziniń alǵashqy TGV-in 1981 jyly ázirlese, Qytaı qazirgi 28 000 mılden astam joldy qamtıtyn eń aýqymdy jelini qura bildi.
Kalıfornıada qazir Los-Andjeles pen San-Fransısko arasyndaǵy joǵary jyldamdyqty temirjol jobasynyń qurylysy jalǵasýda, bul Amerıka Qurama Shtattaryndaǵy osyndaı alǵashqy iri joba bolamaq. Bul da álemdegi ózge jobalar sıaqty japon júrdek temirjolynyń tabysynan úlgi alýda.
Al, elimizdegi júrdek poıyzdardyń tarıhyna toqtalsaq, bizde mundaı poıyzdardyń júre bastaǵanyna 20 jyldan asty. Alǵashqy joǵary jyldamdyqty «Talgo» poıyzdary 2003 jyly Astana – Almaty baǵytynda jolǵa shyqqan bolatyn. Bul jolaýshylarǵa yńǵaıly ári jyldam júretin poıyz boldy. Sodan beri júrdek poıyzdardyń sany artyp, túrli baǵyttarda qyzmet kórsetip keledi. Bastapqy jyldary «Talgo» poıyzdary Ispanıadan jetkiziletin. 2011 jyly «Qazaqstan temir joly» men «Patentas Talgo» kompanıasy Astanada «Tulpar-Talgo» qurastyrý zaýytyn ashty. Al, 2013 jyldan bastap ózimizde qurastyrylǵan poıyzdar júre bastady.