Qazirgi ýaqyt Anglıa bankine ońaıǵa tıip jatqan joq. Baǵa tómendegen saıyn, olardyń bedeli túsip jatyr. Halyqtyń renjıtindeı jóni bar. Óıtkeni kórshiles Fransıa, Germanıa men Ispanıada ınflásıa deńgeıi shamamen 3 paıyzǵa tómendegen,-dep habarlaıdy Almaty-akshamy.kz.
Al Birikken Koróldikte mamyrdaǵy 8,8 paıyz deńgeıinen túspeı tur. SÝnak qamsyz emes. Biraq onyń memlekettik sektordaǵy jalaqyny ósirmeý, ıpotekalyq nesıesi bar azamattarǵa qomaqty somada kómek bermeý sıaqty sheshimderi ábden súıkimin ketirdi, dep jazdy 24.kz. Úkimet basshysy paıyzdyq mólsherlemeni 5 paıyzǵa deıin kóterýdi qoldady. Bul 2008 jylǵy qarjy daǵdarysynan keıingi rekordty kórsetkishke aınaldy.
- Solshyldar men ońshyldardyń tarapynan jasalyp jatqan qysymǵa qaramastan biz alǵan betimizben qaıtpaımyz. Basqa elderge qarańyzdarshy - olar ınflásıany paıyzdyq mólsherlemeni kóterý arqyly tejep otyr. Biz de sondaı qadamǵa barýǵa májbúrmiz. Sondyqtan sabyr saqtaýdy suraımyn, -deıdi Ulybrıtanıa qarjy mınıstri Djeremı Hant.
Sarapshylar «ınflásıaǵa áser etip otyrǵan birneshe faktor bar» deıdi. Birinshiden, Brıtanıada 1 jyldyń ishinde avtosaqtandyrý quny 40 paıyzǵa artty. Buǵan kólik jáne ony jóndeý baǵasynyń kóterilýi sebep. Ekinshiden, áýe bıletteriniń quny 30 paıyzǵa kóterildi. Al saýda, qonaq úı jáne meıramhana bıznesindegi adamdardyń onsyz da tómen jalaqysy áli ósken joq deıdi ekonomıser.
Osy aıda Eýroaımaq ekonomıkasynyń ósimi baıaýlap qaldy. Óıtkeni óndiristiń qarqyny báseńdegen. Jalpy aımaqtaǵy ınflásıa deńgeıi 6 paıyz mólsherinde qalyp otyr. Bul úkimetter mejelegen kórsetkishten 3 ese joǵary.
Saýd Arabıasy koronavırýstan keıin sońǵy 3 jylda alǵash ret qajylyqqa kóp adam qabyldaı bastady. Alaıda ekonomıkalyq daǵdarys kóptegen musylmannyń Mekkege barýyna tusaý bolyp tur. Mysyrda jaz bastalǵaly jyldyq ınflásıa 40 paıyzǵa artty. Qajylyqqa ushaqpen barý bıleti, tamaq jáne qonaq úıde turý quny qymbattady. Biraq Mekkege jetýdiń basqa jeńildeý joldary shyǵyp jatyr. Máselen, Mysyrdyń İshki ister mınıstrligi memlekettik lotereıa oınatýǵa kiristi. Ony utqan adam Qaǵbaǵa 5 jarym myń dollarǵa baryp qaıtady. Al keıbir turǵyndar bıleti arzan avtobýspen baryp jatyr. Qajylyqqa joly túskenderdiń qýanyshynda shek joq.
BLIS:
- Men 6 jyldan beri qajylyqqa barýǵa ótinish berip kelgenmen. Biraq kezek tımeı qoıǵan edi. Bıyl baǵym jandy.
- Áýe bıleti 175 myń mysyr fýnty turady dep estidim. Bul 5 myń dollardan asady. Ondaı aqsha meniń úsh uıyqtasam túsime kirmeıdi. Al avtobýspen barsań, 4 myńdaı dollar ketedi. Soǵan aqsha jınap jatyrmyn.
Mysyrdaǵy taǵy bir qıyndyq - shetel valútasy óte tapshy. Tipti kóptegen bankter qolma-qol aqsha alýǵa shekteý qoıyp tastaǵan. AQSH-ta qymbatshylyq deńgeıi tómendese de, mejeli 2 paıyzdyq mólsherlemege áli jete almaı otyr. Tipti Federaldyq saqtyq qor júıesi bıyl paıyzdyq mólsherlemeni taǵy kóteremiz deıdi. Mamandar onsyz ekonomıkaǵa jan bitpeıdi dep aqtalyp álek.
- Inflásıa ótken jyldyń ortasynan beri birneshe ret tómendedi. Biraq ekonomıka áli eńsesin tikteı almaı keledi. Iá, baǵanyń turaqtylyǵyna Federaldyq saqtyq qor júıesi jaýap beredi. Alaıda paıyzdyq mólsherlemeni kótermeı, eńbek naryǵynda ońdy ózgeris bolady dep aıta almaımyz,-deıdi AQSH Federaldyq rezervtik qor júıesniń tóraǵasy Djerom Paýell.
Álem elderiniń ekonomıkasyna taldaý jasaıtyn «Treıdıń Ekonomıks» (Trading Economics) uıymynyń sońǵy málimeti boıynsha, eń úlken qymbatshylyq qazir Venesýelada bolyp jatyr. Bul eldegi jyldyq ınflásıa deńgeıi 429 paıyzdan asyp ketken. Ekinshi orynda taǵy bir ońtústik amerıkalyq el - Argentına tur. Sondaı-aq ınflásıa Lıvan men Iranda da óte joǵary. Jalpy sarapshylar paıyzdyq mólshemelerdi kóterý 1 jyldan keıin tıimdiligin kórsetedi deıdi.