Aýa raıynyń qolaısyzdyǵy sharýalardy ábigerge salyp tur.
Eýropalyq dıqandar záıtún tapshylyǵynan tarshylyq kórse, Shrı-lanka halqy kúrishsiz qalýy múmkin. Eýropa záıtúnge zar. Tapshylyq ásirese Ispanıa men Italıa elderinde baıqalady. Jergilikti bılik ókilderi bıyl óndiris kóleminiń 20 paıyzǵa tómendeıtinin alǵa tartady. Sharýalardyń aıtýynsha, mundaı jaǵdaıǵa birinshi kezekte qurǵaqshylyq áser etken, dep habarlaıdy Almaty-akshamy.kz 24.kz-ke silteme jasap.
Bul óz kezeginde záıtúnniń qymbattaýyna túrtki bolyp otyr. Byltyrmen salystyrǵanda baǵa kádimgideı ósip ketken. Máselen, Italıa men Portýgalıada kóterme saýda baǵasy 2 ese ósse, Grekıada záıtúnniń bir kelisi 8 eýrodan saýdalanyp jatyr.
Fransıa:
Fransıalyq sharýalar da shyǵynǵa battyq dep shyryldap otyr. Óıtkeni aptap ystyqtan júzim alqaptary qýrap ketken. Sonyń saldarynan bıylǵy ónim 10-20 paıyzǵa tómen bolady deıdi. Tyǵyryqqa tirelgen sharap óndirýshileri endi ne isterin bilmeıdi. Tek óz-ózderin jubatyp, az da bolsa, sapaly ónim jınap alýǵa úmittenedi.
Taıaý shyǵys:
Gaza sektorynda da osyǵan uqsas jaǵdaı. Ekken júzim aptapqa shydamaı keýip ketken. Sonyń saldarynan bıyl túsim óte az. Tipti byltyrǵy kórsetkishten 60 paıyzǵa kem. Aýyl sharýashylyǵy mınıstrligi ókilderiniń aıtýynsha, aýa raıynyń qolaısyzdyǵy júzimge ǵana emes, ózge de ónimderge zardabyn tıgizgen. Saldarynan baǵa kúrt kóterilip, halyqtyń qaltasyna salmaq salyp tur.
Shrı-lanka:
Shrı-lankada «aqmarjan daǵdarysy» týyndaýy múmkin. Daqyldy sýaratyn sý joq. Jazda jaýyn az jaýǵandyqtan sý qoımalary da keýip qalǵan. Bul ahýal qazir buqarany da, bılikti de alańdatyp otyr. Aýyl sharýashylyǵy mınıstri keltirgen málimetke sáıkes, 30 myń gektardan astam alqap qurdymǵa ketýi múmkin. Biraq sarapshylar bul kórsetkishke kúmánmen qaraıdy. Shyǵyn kólemi budan áldeqaıda joǵary bolatynyn aıtady. Aıta óteıin, Shrı-lanka halqy úshin kúrish negizgi azyqtyń biri. Hám iri kásip túri. Búginde bul salada 2 mıllıondaı adam eńbek etedi.